ЕУ останува алтернатива и за Северна Македонија и за регионот и очекуваме Унијата да ги цени достигнувањата во Скопје, рекол првиот вицепремиер на средбата со косовската шефица на дипломатијата
Во првата половина на септември оваа година ќе се одржи заедничка владина седница на Северна Македонија и Косово, договорија првиот вицепремиер, Артан Груби, и косовската вицепремиерка и шефица на дипломатијата, Доника Грвала-Шварц.
Од кабинетот на Груби соопштија дека тие на средбата дискутирале и за актуелната состојба во регионот, соработката и интеграцијата на Западен Балкан во ЕУ.
„Алтернатива на Република Северна Македонија, но и на регионот останува Европската Унија. Ние како земја сме направиле многу храбри чекори во политички аспект, ги спроведуваме реформите и очекуваме ЕУ да ги цени тие достигнувања, и во меѓувреме работиме на подигнување на животниот стандард за граѓаните“,
истакнал Груби на средбата.
Билатералните односи меѓу Северна Македонија и Косово, констатирале тие, се одлични и соработката ќе продолжи и во иднина преку заеднички проекти.