Товарно возило, во кое се пренесувале 36 килограми марихуана, се превртело на автопатот Скопје-Велес, па при увидот е пронајдената „стоката“ што требало да заврши во Турција.
Одделот за сузбивање организиран и сериозен криминал – Единица за недозволена трговија со дрога при Бирото за јавна безбедност до ОЈО Велес поднесе кривична пријава против А.И. (59) и З.М. (52), двајцата од Куманово, за сторено кривично дело неовластено производство и пуштање во промет наркотични дроги, психотропни супстанции и прекурсори.
Како што информира Министерството за внатрешни работи, двајцата кумановци набавиле марихуана од Косово заради натамошен транспорт до Турција, со цел стекнување противправна имотна корист.
На 4 ноември годинава тие отпатувале во Косово за да ја преземат марихуаната, по што се вратиле во С Македонија, а товарното возило во кое била марихуаната, по насоки на А.И., било паркирано на договорена локација во Скопје.
На 9 ноември, З.М., по инструкции на А.И., тргнал за Турција, при што на автопатот Скопје-Велес изгубил контрола над возилото и излетал од патот. Полициски службеници извршиле преглед на товарното моторно возило и во него пронашле марихуана. Пронајдената марихуана е предадена на вештачење и е утврдено дека е со вкупна нето тежина од 36 килограми.
Лицата се лишени од слобода и изнесени пред судија на претходна постапка, при што им е одредена мерка притвор во траење од 30 дена.