Средбата на Мицкоски со пратеничката група на ВМРО-ДПМНЕ е во пресрет на утрешната седница на Комисијата за уставни прашања, на која како единствена точка на предложениот дневен ред ќе се најде предлогот за пристапување кон измена на Уставот на земјава
Нашиот став е јасен и непроменет, рече Мицкоски и додаде дека ниту на комисиската ниту на пленарната седница во Собранието пратениците од ВМРО-ДПМНЕ и коалицијата ќе гласаат против уставните измени
Претседателот на опозициската ВМРО-ДПМНЕ, Христијан Мицкоски, во објава на социјалните мрежи информира дека денеска одржал работна средба со пратеничката група на ВМРО-ДПМНЕ и коалицијата во Собранието.
Средбата меѓу Мицкоски и пратениците од неговата партија е во пресрет на утрешната седница на Комисијата за уставни прашања, на која како единствена точка на предложениот дневен ред ќе се најде предлогот за пристапување кон измена на Уставот на земјава.
Во кусата објава на Фејсбук во која информира за остварениот работен состанок, Мицкоски додава:
„Поддршка на ставот дека Уставни измени под бугарски диктат нема да има. Силно и одлучно на страна на народот и интересите на Македонија.“
Претходно денеска Мицкоски во изјава за медиумите кажа дека ставот на ВМРО-ДПМНЕ за уставните измени е јасен и непроменет повеќе од една година, а додаде дека не гледа причина ниту да биде променет под, како што вели, ваков диктат. И на комисиската и на пленарната седница во Собранието, додаде Мицкоски, пратениците од ВМРО-ДПМНЕ и коалицијата ќе гласаат против уставните измени.
„Утре ќе бидеме таму присутни, а кога точката ќе биде ставена на дневен ред, коалицијата предводена од ВМРО-ДПМНЕ ќе гласа против. Така ќе биде и на самата седница кога овие уставни измени предвидени според работната група за уставни измени предводена од Цаца-Николовска се доставени во парламент“,
изјави Мицкоски.
Изјавата на лидерот на најголемата опозициска партија доаѓа во пресрет на утрешната седница на Комисијата за уставни измени на која се очекува да почне расправата за предлогот за пристапување кон измена на Уставот.
Почетокот на седницата е закажан за 10 часот.
Инаку, денеска во Собранието се одржа редовна средба на собранискиот претседател Талат Џафери со координаторите на пратеничките групи, на која, како што јавува МИА, не присуствувале од ВМРО-ДПМНЕ. Очекувањата на дел од присутните на координативната средба се дека Џафери ќе комуницира со координаторот на пратеничката група на ВМРО-ДПМНЕ, Никола Мицевски, до пред почетокот на седницата.
На утрешната седница на Комисијата за уставни прашања, по усвојувањето на дневниот ред, предлогот во 30 минути ќе го образложи премиерот Димитар Ковачевски, а по него ќе зборуваат пријавените членови и заменици на ова законодавно тело, а потоа право за збор ќе имаат и други пратеници.
Најавите се дека пријавени за збор ќе има од сите пратенички групи, како и дека на Комисијата ќе учествуваат и пратениците од опозициската ВМРО-ДПМНЕ кои претходно кажаа дека на седницата ќе образложат зошто се против усвојувањето на измените.