Во предлог-законот за помилување конечно е вклучена заложбата на претседателот Пендаровски за исклучување на аболицијата во нашиот правен систем, односно да се оневозможи правото на шефот на државата да помилува лица за кои е во тек истражна или судска постапка, а нема правосилна пресуда, велат од кабинетот на претседателот на државата
Во предлог-законот за помилување, кој денеска е доставен до Владата, се исклучува можноста претседателот на државата да може да помилува лица за кои е во тек истражна или судска постапка. Од кабинетот на претседателот Стево Пендаровски, денеска преку соопштение информираа дека во предложеното законско решение е вклучена заложбата на шефот на државата за исклучување на аболицијата од нашиот правен систем.
„Во однос на предлог-законот за помилување, во чија изработка беше вклучен и претставникот на претседателот, конечно е вклучена заложбата на претседателот Пендаровски за исклучување на аболицијата во нашиот правен систем, односно да се оневозможи правото на шефот на државата да помилува лица за кои е во тек истражна или судска постапка, а нема правосилна пресуда“,
велат од кабинетот на претседателот на државата.
На овој начин, како што посочуваат од кабинетот, ќе се овозможи кривичните судови да ја остварат во целост својата основна функција, а таа е во соодветна постапка да ја утврдат вината на обвинетите и да ги осудат виновните сторители на кривични дела.
Министерството за правда денеска соопшти дека предлог-законот за помилување е доставен во владина процедура.
И оттаму велат дека според предложеното законско решение, претседателот на државата ќе може да помилува само лица кои се правосилно осудени и на кои веќе им е одредена казна, но не и оние што се предмет на кривично гонење.
Од Правда ја посочија и самата постапка за помилување каде што, како што нагласуваат, се предвидени кратки рокови за секоја од институциите кои се вклучени во постапката. Како значајни, Министерството за правда ги истакнува и одредбите за одговорност на лицата кои постапуваат по предметите, но и на нивните претпоставени.
Од Правда соопштија дека на измените на овој закон се работело подолг период, а оти биле разгледани повеќе компаративни искуства, а најголем дел од решенијата, според Министерството, се содржани во легислативата на земјите членки во ЕУ и кај оние држави кои имаат слични правни системи со нашиот.
Во мај годинава Министерството за правда организираше јавна дебата по однос на измените на законот, а работната група задолжена за изготвување на законот застана зад решението според кое претседателот ќе може да помилува само лица на кои веќе им е одредена казна, но не и на оние што се предмет на кривично гонење.