Прелиминарните податоци на „Коперник“ покажуваат дека глобалната просечна температура во неделата била 17,09 Целзиусови степени, со што рекордот од минатата година на 6 јули е надминат за 0,01 Целзиусов степен. Прогнозите на експертите се загрижувачки
Во неделата (21 јули), на Земјата е измерена највисоката температура, односно регистриран е најтоплиот ден откако луѓето ги мериме температурите, соопшти Европската климатска служба „Коперник“.
Прелиминарните податоци на „Коперник“ покажуваат дека глобалната просечна температура во неделата била 17,09 Целзиусови степени, со што рекордот од минатата година на 6 јули е надминат за 0,01 Целзиусов степен.
Според експертите од областа, без климатските промени предизвикани од човекот, рекордите не би се уривале толку често, а ладни рекорди би биле поставувани исто толку често колку и топлите.
„Она што е навистина запрепастувачки е колку е голема разликата помеѓу температурата во последните 13 месеци и претходните температурни рекорди“,
изјави директорот на „Коперник“, Карло Буонтемпо.
Според него, во наредните месеци и години се очекуваат нови топлотни рекордни.
„Сега сме навистина на непозната територија и додека климата продолжува да се затоплува, веројатно ќе сведочиме нови рекорди во следните месеци и години“,
потенцира Буонтемпо.
Иако 2024 година е исклучително топла година, она што новиот рекорд забележува е дека зимата на Антарктикот била потопла од вообичаено. Истото се случуваше и на јужниот континент минатата година кога беше поставен рекордот (6 јули 2023).
Но не е во прашање само потоплиот Антарктик. Топлотниот бран предизвика повеќе пожари годинава и во САД и во Европа.
„Секако е загрижувачки знак што рекордот доаѓа по 13 последователни месеци“,
вели климатскиот научник од „Беркли“, Зик Хаусфадер, кој проценува дека шансите се 92% оти 2024 година ќе биде најтопла година досега.
Јули е генерално најтоплиот месец во годината на глобално ниво, најмногу поради тоа што има повеќе копно на северната хемисфера, па сезонските обрасци од таму ги поттикнуваат глобалните температури.
Научниците тврдат дека согорувањето на јаглен, нафта и природен гас од страна на човекот, се најголемите причини за затоплувањето.
Мерењата на „Коперник“ датираат од 1940 година.