Трагедијата во Кочани само ја потенцира потребата од овој кадар, нагласија учесниците на конференцијата на медицински сестри од Југоисточна Европа, која се одржува во земјава. На настанот присуствуваа и сестри од соседните земји кои им помагале и помагаат на повредените, изделувајќи ја важноста на прекуграничната соработка
Во земјава се потребни речиси двојно повеќе медицински сестри отколку што има во моментов. Така вели Гордана Бешлиовска од Унијата на здруженија на медицински сестри, акушерки и техничарки. Проценките се изработени според бројот на населението.
„Неофицијално, податоци на Институтот за јавно здравје зборуваат дека сме 9 200, меѓутоа потребите според нашите стандарди се некаде на 14-15 000 медицински сестри. Тоа е, мислам, една бројка којашто можеби многу тешко ќе ја достигнеме како таква, меѓутоа потребни ни се преструктурирања во болниците каде што можеби имаме начин и можност од таму каде што можеме да надополниме, таму каде што сериозно немаме и недостасуваат“,
изјави Гордана Бешлиовска.
Во тој контекст, вели Бешлиоска, будно се следи и последниот развој на настаните околу ветувањето за решавање на работниот статус на многу медицински сестри кои не се вработени.
„Многу е важен моментот на конкурсите кои сега ги очекуваме во текот на април месец, за да се решат статусите на сестрите кои се договор на дело во овој момент во болниците коишто чекаат и секојдевно се јавуваат во Унијата и во Здружението, ја очекуваат и понатака нашата поддршка“,
додаде таа.
На конференцијата присуствуваа медицински сестри од регионот, дел од кои лично им помогнале на настраданите од пожарот во Кочани или, пак, сè уште помагаат. Ја истакнаа важноста на соработката, токму во вакви случаи, бидејќи трагедии им се случуваат на сите држави, а ресурсите се ограничени.
„Она што ми е драго е колку сме сите поврзани во вакви ситуации стоејќи едни покрај други. Сега ние сме со вас, но секогаш може да ни се случи и нам. Важно е да бидеме едни покрај други“,
изјави Адриано Фрегановиќ, претседател на Европската организација на сестри спејалисти.
„Седумнаесет деца дојдоа кај нас, од нив четворица беа пренесени во Ниш, останатите се добри, стабилни, не се на респиратор и се надеваме на најдоброто“,
изјави Мирјана Прибичевиќ, главна медицинска сестра на Клиничкиот центар – Србија
Ана Тодорова, медицинска сестра од Софија, пак, извести за пациентите што се лекуваа таму:
„Многу се подобри, ние имавме и делегација од Македонија да ги видат“.
Конференцијата првично било предвидено да се одржи на 22 март. Била одложена токму поради напливот на пациенти за кои е потребна осоебена грижа по пожарот во Кочани.
Во текот на денот, ќе бидат доделени и признанија. Бешлиовска го реафирмира и барањето – да се направи сестринска комора, Закон за сестри и да се воведат лиценци за сестрите.