Владата еднострано ќе го раскине договорот за концесија за експлоатација на рудникот за бакар и злато кај селото Иловица во Општина Босилово.
Ваквата одлука, која е донесена на вчерашната седница, е поради тоа што концесионерот нема поднесено барање со целокупна неопходна документација за издавање дозвола за експлоатација на минерални суровини во рок од четири години по склучување на договорот за концесија за експлоатација на минерални суровини.
Одлуката стапува во сила наредниот ден откако ќе биде објавена во „Службен весник“. Со оваа одлука се раскинуваат договорот за концесија за експлоатација на минерална суровина – руди на бакар и злато на локалитетот с. Иловица, општина Босилово, од 2014 година и анекс на договорот од 2015 година, како и одлуката за доделување концесија на Друштвото за производство, промет и услуги „Фелпс Доџ Вардар“ ДООЕЛ Скопје од 2012 година
Министерот за економија Крешник Бектеши на почетокот на октомври го потпиша документот со кој беше побарана одлука за раскинување на договорот за експлоатација на рудникот Иловица Штука, откако второстепената комисија донесе одлука со која се раскинува договорот со компанијата „Еуромакс рисорсис“.
Во Општина Босилово пред две години беа организирани два неуспешни референдума во однос на изградбата на рудникот, а преку граѓански иницијативи беа организирани и протести на локалното население и екоактивисти против изградбата на „рудници на смртта“.