Македонските власти смируваат посочувајќи дека институциите се подготвени да се справат со евентуален бегалски бран, грчките власти, пак, на границата со Турција спречиле речиси 10 000 обиди за нелегален влез.
За евентуален бегалски бран во земјава институциите се подготвени, тврдат надлежните. Полицијата е постојано присутна на јужната граница, состојбата е непроменета и има стандарден број обиди за нелегален влез во нашата држава.
Од Министерството за внатрешни работи порачуваат дека граѓаните немаат причина за загриженост, состојбата е непроменета и оти има стандарден број обиди за нелегален влез во нашата држава.
„Граѓаните немаат причина за загриженост. МВР, односно нашата полиција е подготвена и постојано присутна на јужната граница. на нашите полициски службеници веќе неколку години им помагаат и полициски службеници од неколку пријателски држави и со заеднички сили се справуваме со сите нелегални обиди за влез“,
изјави портпаролот на МВР, Тони Ангеловски.
Подигање на нивото на претпазливост поради бегалски бран кон европските земји доаѓа по минатонеделната закана од Турција дека ќе ги отвори границите. Ова следуваше откако имаше напад врз турските сили во Идлиб, Сирија, при што загинаа повеќе од 30 турски војници.
Последните информации во врска со состојбата со мигрантите кои доаѓаат од грчки владини извори, а ги пренесуваат медиумите, се дека само во изминатите 24 часа биле спречени 9 877 обиди за нелегален влез и биле уапсени 68 лица.
Според истите информации, јавува МИА, биле фрлени солзавци и шок-бомби од турска на грчка страна, во обид, како што коментираат истите извори, да се разбијат грчките сили, а инцидентите на грчко-турската граница продолжиле и во раните утрински часови.