Голема полициска акција спроведува турската полиција во Истанбул и на неколку други локации, а поврзана со апсење на лица од организацијата на Седат Пекер, кој деновиве е актуелен во македонската јавност поради аферата со лажни пасоши.
Според информациите кои ги објавува Daly Sabah“, досега приведени се 49 од 63 лица осомничени за криминални активности, додека Пекер е надвор од Турција.
Како што пишуваат дел од медиумите, групата е осомничена за низа дела, почнувајќи од злосторничко здружување, грабежи, мито, киднапирање … Во рамки на акцијата биле проверени 121 локација во Истанбул, Анкара, како и во регионите на Хатај, Трабзон и Кочаели. Едно од местата каде е правена рација е и вилата на Пекер во Истанбул.
Пекер престојуваше во земјава, но беше протеран, а деновиве неговото име го спомена опозициската ВМРО-ДПМНЕ на прес-конференција зборувајќи за аферата која ја нарече „Мафија“, а која МВР ја води под кондно име „Двојник“. Претседателот Христијан Мицкоски рече дека Пекер е една од озлогласените личности кои добиле македонски пасош со туѓ идентитет. Како што изјавие, турскиот државјанин се појавил во полициската станица во Драчево и се сликал за личен документ под името Џадин Адемовски, како бизнисмен.
Премиерот Зоран Заев, пак, вчера одговараше на конкретно новинарско прашање за тоа дали Пекер се среќавал со негови коалициски партнери велејќи дека е точно тоа и нема ништо спорно. Во одговорот Заев не негираше дека Пекер е еден од оние што добиле фалсификуван пасош и притоа нагласи дека тој што работел на нелегалното издавање пасош е дел од самата постапка која е процесирана пред правосудните органи.
Од друга страна, во медиумите се појави и демант од Пекер, испратен од двајца адвокати, во кој се наведува дека не е точно оти тој поседувал македонска патна исправа.