Епицентарот на инфекцијата во европскиот регион моментно е во Велика Британија, Русија, Шпанија и Франција, кои регистрираа најмалку 10 000 заразени во секој од последните три дена
Во Европа за првпат се регистрирани над 100 000 новоинфицирани со новиот коронавирус во последните 24 часа, откако бројот на новозаразени во држави како Русија и Велика Британија не престанува да се зголемува во последните пет дена.
Светската здравствена организација денес соопшти дека повторно е забележано рекордно еднодневно зголемување на глобалните случаи на коронавирус, така што за 24 часа има 350.766 нови случаи. Моментно, во Европа има повеќе од 16 отсто од инфекциите на светско ниво и речиси 22 отсто од смртните случаи низ целиот свет.
Вчера, кога новозаразените ја надминаа границата од 100 000, Источна Европа беше најпогодениот регион со повеќе од 33 600 новоинфицирани.
Во Западна Европа, Франција забележа рекордни 20 339 инфекции во последните 24 часа, при што болниците влегоа во режим на итни случаи, а најголемите градови во земјата затворија установи за да се ограничи понатамошното ширење на вирусот.
Новите инфекции низ Европа растат во текот на изминатата недела, дури и кога новите инфекции во најпогодените земји, како што се Индија и Бразил, покажуваат знаци на забавување.
Епицентарот на инфекцијата во европскиот регион моментно е во Велика Британија, Русија, Шпанија и Франција, кои регистрираа најмалку 10 000 заразени во секој од последните три дена.
Русија денеска соопшти за најголем број на заразени лица во текот на денот од почетокот на епидемијата, бидејќи претходниот рекорд беше во мај, што ги натера властите во Москва да размислат за затворање барови и ноќни клубови.
Белгија воведе и построги контроли врз собирите, бидејќи земјата бележи зголемување на нови инфекции. Новите случаи на коронавирус се зголемија повеќе од 2,6 пати од почетокот на октомври. Ковид-19 однесе повеќе од 10 000 животи во државата, во која живеат 11 милиони жители.
Во Европа, бројот на заразени за 24 часа во просек е околу 78 000 од почетокот на октомври, во споредба со просечно 47 500 новоинфицирани во септември.