Фабриката за челик Азовстал во Мариупол, една од најголемите во Европа, е тешко оштетена во бомбардирање, соопштија денеска украинските власти.
„Уништена е една од најголемите челичарници во Европа. Економските загуби за Украина се огромни“,
изјави пратеничката Лесија Василенко, која на својот Твитер профил објави видео на кое се гледаат густи столбови чад како излегуваат од индустрискиот комплекс.
Друг пратеник, Серхи Тарута, на својот Фејсбук профил напиша дека руските сили кои го држат Мариупол под опсада „речиси ја уништиле фабриката“.
Извршниот директор на Азовстал, Енвер Цкитишвили, во видео порака на Телеграм рече дека неговата компанија презела мерки во фабриката од почетокот на руската инвазија на 24 февруари за да спречи загадување на животната средина доколку биде нападната.
Украинскиот претседател Вододимир Зеленски денеска изјави дека нападот врз Мариупол е терор, кој ќе се памети со векови. Тој тврди дека Русија извршила воени злосторства во градот, каде тешките борби сега се стигнати до центарот.