Ако Ковачевски веднаш не го разреши Милошевски ќе ја потврди директната поврзаност, односно дека и тој лично е дел од шемата за давањето на македонско државјанство на Украинецот Олександр Онишченко, велат од ВМРО-ДПМНЕ
Опозициската ВМРО-ДПМНЕ денеска побара од премиерот Димитар Ковачевски да го разреши новиот директор на АНБ Зарко Милошевски. Драган Ковачки, пратеник и член на ИК на ВМРО-ДПМНЕ, на денешната прес конференција рече дека ако Ковачевски веднаш не го разреши Милошевски ќе ја потврди директната поврзаност, односно дека и тој лично е дел од шемата за давањето на македонско државјанство на Украинецот Олександр Онишченко.
„Зарко Милошевски не треба ниту ден повеќе да биде на чело на АНБ. Во јавноста излезе документ од кој се гледа дека токму Милошевски ја одобрил позитивната проверка за Онишченко, со која се потврдува дека тој не е безбедносен ризик за државата. Доколку Зарко Милошевски како одоговорно лице во АНБ не ја одобрел позитивната проверка, Онишченко немало да добие македонско државјанство“,
истакна Ковачки.
Тоа што, додаде Ковачки, Милошевски со свој потпис, како одговорно лице во АНБ одобрил Онишченко да добие државјанство не е воопшто наивно, а неговото назначување од страна на Ковачевски, како и тоа што веднаш по назначувањето ја сменил комисијата за одговорност, е јасен показател дека Ковачевски знаел дека Зарко Милошевски е потписникот на проверката, но го поставил за директор со цел истиот да ги покрие сопствените и трагите кои водат до Ковачевски.
„Јасна е линијата. Зарко Милошевски ја одобрил позитивната проверка, Виктор Димовски ја потпишал како директор и ја пратил до МВР, а Ковачевски на влада му доделил државјанство. Одговорност мора да има и од Милошевски и од Димовски. Ако Ковачевски не е директно вмешан како последен во алката, тогаш веднаш да го разреши Зарко Милошевски од позицијата директор на АНБ, и да го запре именувањето на Виктор Димовски за амбасадор во Париз“,
додаде Ковачки и нагласи дека за досието на Онишченко, кој е на црната листа на САД постојат докази, а и Стево Пендаровски, колку и да сака да се додоворува на СДС, ги призна сите овие факти.
Новиот директор на Агенцијата за национална безбедност (АНБ), Зарко Милошевски ќе продолжи онаму каде што застана неговиот претходник Виктор Димовски, во врска со истрагата за пропустот на Агенцијата во случајот „Онишченко“, како и со реферирањето за резултатите од неа пред надлежната собраниска комисија и пред Владата, најави премиерот Димитар Ковачевски во петокот.
Зарко Милошевски за нов директор на Агенцијата за национална безбедност (АНБ) беше назначен на 14 декември и на функцијата доаѓа од позицијата помошник-директор на Одделот за безбедносни проверки и НАТО-регистар во Агенцијата за национална безбедност. Тој дојде на местото на Виктор Димовски, кој од директорското столче во АНБ треба да замине за амбасадор во Париз, Франција.
Токму во време на директорување на Димовски, Владата на контроверзниот Украинец Олександр Онишченко му издаде македонско државјанство. Во врска со случајот „Онишченко“, Владата потоа му го поништи државјанството на Украинецот, а претходно е поведена постапка за суспензија на двајца вработени во АНБ.