ВМРО-ДПМНЕ обвини дека премиерот Зоран Заев му овозможил да избега на Сашо Мијалков како награда за, како што кажа, уништување и разнебитување на Македонија.
„Оливер Спасовски молчи, Радмила Шекеринска ја нема никаде, а Зоран Заев жали и ја префрла вината. Имаат 24 часа да го обезбедат бегалецот од правдата. 24 часа, Зоран Заев, Оливер Спасовски и останатите од Владата да го обезбедат бегалецот од правдата. За тоа што се што зборувавме во изминатите години, а и што го зборуваме денес се потврдува, а тоа е дека со Македонија владее криминална коалиција, која што ги руши основните вредности, која што го руши системот на владеење на правото, која што го уништува нормалното живеење во Македонија, која што влијае врз бизнисите и истите ги рекетира или ги презема. Со Македонија владее крими-коалиција. И за тоа очекуваме во следните 24 часа да го обезбедат бегалецот од правдата“,
вели потпретседателот на ВМРО-ДПМНЕ, Александар Николовски.
Од ВМРО-ДПМНЕ укажуваат дека ја обзнаниле криминалната коалиција на 22 октомври 2018 година. Според Николовски, неа ја сочинуваат премиерот Зоран Заев, неговиот брат Вице Заев и Сашо Мијалков.
„Таа коалиција, не овие три години туку 15-ина години наназад работи на уништување и разнебитување на Македонија. Наградата за тоа уништување и разнебитување на Македонија од Зоран Заев стигна овој викенд на начин што се овозможи да се избега од правдата. И во овој момент имаме бегалец од правдата“,
го пренесе ставот на ВМРО-ДПМНЕ, партискиот потпретседател Николовски.