Од опозициската партија првично излегоа со двосмислени позиции во однос на наредбата на администрацијата на САД, која го додаде и непочитувањето на договорот со Грција н листата за можни санкции
Ние ја почитуваме волјата на граѓаните, изјавија денеска Антонио Милошоски, претседател на собраниската Комисија за надворешни работи од ВМРО-ДПМНЕ и Тимчо Муцунски, кој е меѓународен секретар на партијата, одговарајќи на прашање дали како партија ќе почнат да го почитуваат Преспанскиот договор и нема да бараат негово поништување ако ВМРО-ДПМНЕ дојде на власт. Во контекст на наредбата на САД со која и за непочитувањето на Преспанскиот договор се предвидени санкции, и Милошоски и Муцунски посочија дека право на секоја суверена држава е да ја заштити својата национална безбедност и демократија на начин на кој смета дека е потребно.
„Стратешки приоритет на ВМРО-ДПМНЕ беше членството во НАТО со заштита на нашиот национален идентитет, а сега и членството во ЕУ. И ние ја почитуваме и ќе ја почитуваме волјата на граѓаните“,
изјави Муцунски, одговарајжи на новинарски прашања, на денешната прес-конференција што се однесуваше на ребалансот на буџетот.
Ниту тој, ниту Милошоски, всушност не дадоа прецизен одговор што подразбираат под „волјата на граѓаните“ и дали мислат на референдумот за името, што ВМРО-ДПМНЕ премолчано го бојкотираше.
Тој рече дека приоритет во меѓународната политика треба да биде борбата против корупцијата, со оглед на тоа што САД предвидуваат санкции и за таа цел. Милошоски, пак, рече „ние сме легалисти“, во однос на тоа дали ВМРО-ДПМНЕ ќе го почитува Преспанскиот договор.
„Имавме во изминатите години искуство со такви санкции, а личностите што беа на црната листа сега се коалициски партнери на Заев. Кога веќе се предвидени санкции и за корупција, би било добро САД да се позанимаваат со фамилијата на власт во земјава“,
рече Милошоски.
На прашање дали очекуваат некој од ВМРО-ДПМНЕ да се најде на листата за санкции, Муцунски и Милошоски рекоа дека тоа е прашање за САД. Милошоски, пак, дофрли иронично дека на листата би можел да се најде поранешниот директор на Фондот за здравство Ден Дончев.