Од опозициската партија обвинуваат дека Владата не реагира на покачувањето на цената на заштитните маски, ниту за зголемување на капацитетите за карантин
Опозициската ВМРО-ДПМНЕ денеска ја обвини Владата дека била неподготвена да реагира на појавата на коронавирус во земјата. Дафина Стојановска на прес-конференцијата денеска го обвини министерот Венко Филипче дека дал контрадикторни изјави за тоа како пациентката, која е првиот потврден случај на заболен со коронавирус во земјата, стигнала до Инфективната клиника.
„Во Македонија се детектираше првиот заразен со коронавирус, но Филипче не знае да ја информира јавноста како жената стигнала до Клиниката за инфективни болести. Сегмент што е многу важен за превенција од корона и говори дали има контрола на граничните премини или не. Филипче и надлежните кажаа различни работи. Прво, кажаа ‘сама заминала на Клиниката’, потоа кажаа ‘беше спроведена до Клиниката’, за на последниот прес синоќа Филипче да каже сосема спротивна и најнова верзија или дека не кажала на граница дека е болна“,
рече Стојановска.
Таа во име на партијата ја обвини Владата дека додека повикува повикува на користење средства за заштита, не реагира на енормното зголемување на цената на маските. Исто така, од ВМРО-ДПМНЕ сметаат дека земјата нема ниту соодветни капацитети за спроведување карантин за да се одговори на ситуацијата.