Според најавите, се очекува на Конгресот да присуствуваат од 850 до 860 делегати и околу 1 800 гости. Освен изборот на претседател, ќе бидат избрани и Статутарна комисија и Комисија за надзор на финансиското работење, тела кои формално го заокружуваат внатрепартискиот архитектон на новиот мандат
Владејачката ВМРО-ДПМНЕ в сабота во Кавадарци ќе го одржи 18. партиски Конгрес, на којшто ќе се избира претседател на партијата, а ќе се усвои и конгресен документ „Ново поглавје – стратегија за Македонија 2030“ којшто претставува визија за тоа како партијата ја гледа Македонија и кои се столбовите на кои ќе ја темели својата политика.
Како што информира лидерот на партијата, Христијан Мицкоски, на денешниот брифинг со новинарите, во трката за претседател тој е единствен кандидат. Мицкоски претходно во интервју за „360 степени“ најави дека ова ќе биде неговиот последен мандат на чело на ВМРО-ДПМНЕ, доколку ја добие поддршката од делегатите.
Според најавите, се очекува на Конгресот да присуствуваат од 850 до 860 делегати и околу 1 800 гости. Освен изборот на претседател, ќе бидат избрани и Статутарна комисија и Комисија за надзор на финансиското работење, тела кои формално го заокружуваат внатрепартискиот архитектон на новиот мандат.
На Конгресот ќе биде усвоен и извештај за финансиско-материјалното работење на партијата и, како што нагласи Мицкоски, ВМРО-ДПМНЕ по првпат нема долгови како партија, ниту, пак, изложеност према банки.
Тој информира дека во јануари следната година ќе предложи нов состав на Извршниот комитет на партијата, по што до март-април ќе следува и генерален избор на претседатели на општински комитети, избор на нови структури на партијата, а веќе во април-мај најави и реконструкција на владата.
Мицкоски ја отфрли идејата за предвремени парламентарни избори напролет 2026 година, посочувајќи дека следната година е предизвикувачки период за државата во кој треба да се продолжи со реформската агенда, но и да се одржи макроекономската стабилност на земјата.
Во однос на прашањето за уставните измени, кои се клучен услов за земјава да ги продолжи преговорите со Европската Унија, Мицкоски кратко искоментира: „Немаме партнер за танго“, алудирајќи на моменталната политичка криза во Бугарија. Тој нагласи дека како влада се подготвени да седнат на заедничка маса со нашиот источен сосед, без оглед дали таква средба би се одржала во Брисел или, пак, во Софија. Тој нагласи и оти нема никакво поместување во однос на гаранциите кои Владата ги бара од Брисел дека на земјава нема да ѝ се наметнуваат нови услови на патот кон Европа доколку Бугарите бидат внесени во Уставот.
Мицкоски на брифингот го коментираше и најавениот протест што следниот викенд, на 13 декември, во Скопје, ќе го организира лидерот на ДУИ, Али Ахмети, за поддршка на поранешните водачи на ОВК на кои им се суди во Хаг.
Според лидерот на ВМРО-ДПМНЕ, Ахмети прави обид да се мобилизира пред Конгресот, но, како што рече, ова е погрешен чекор поради кој во иднина тешко ќе може да најде политички партнер. Според Мицкоски, протестот дополнително ќе го изолира Ахмети и ќе го обележи како генератор на нестабилност во државата. Мицкоски е убеден дека неговиот коалициски партнер ВЛЕН нема да даде поддршка на протестот.