Денеска е голем ден за правната држава бидејќи влегува во сила тешко донесениот Закон за јавно обвинителство, порача носителот на кандидатската листа на СДСМ и коалицијата „Можеме“ во првата изборна единица, Никола Димитров.
Тој прес-конференцијата ја одржа пред зградата на Јавното обвинителство, каде се најде и портпаролот на ВМРО-ДПМНЕ, Наум Стоилковски.
„А јас реков ќе си побарате истрага за 300 000 евра од Миодраг до Зоран Заев, дадени црни пари за кампања за референдум“,
рече Стоилковски упаѓајќи во говорот на Димитров.
Тој продолжи да зборува на висок тон прашувајќи го кандидатот за пратеник и актуелен министер за надворешни работи како не му е м да застане пред јавното обвинителство.
Димитров, пак, возврати дека ВМРО-ДПМНЕ не само што бега од правда туку сака и да го спречи говорот за правда.
„Кога погодувате точно во сржта, во нервот, вака изгледа. Овој театар е уште еден доказ којшто најпластично покажува дека опозицијата прави шум со цел јавноста да не ја дознае вистината за нивните криминали. Овој упад покажува уште еднаш дека основната кауза на опозициската ДПМНЕ е да бега од правда. Драго ми е што ја потсетија јавноста за начинот на нивното справување со вистината и благодарам што им дадоа уште една причина на граѓаните да гласаат против симболот на неказнивоста“,
рече Димитров.
Пред „упадот“, тој потсети дека Законот за јавно обвинителство е важен за нашата кандидатура за ЕУ во очите на Брисел и дека и претходниот еврокомесар за проширување, Јоханес Хан и актуелниот Вархеји, укажуваа за неговата важност.
„Некои земји членки многу експлицитно бараа овој закон да биде донесен, како што е Холандија особено холандскиот парламент. Закон што после година и пол тешки преговори во обид за политички консензус, се донесе со дво-третинско мнозинство, но без учеството на опозициската ДПМНЕ. Зошто велам денеска е голем ден? Затоа што случаите врзани со прислушуваните разговори што ги истражуваше и за кои подигнуваше обвиненија поранешното СЈО заради овој закон нема да одат под килим. Одат во рацете на Јавното обвинителство. Второ, покрај тоа што случаите нема да одат под килим, овој закон овозможува јавните обвинители да не ги бираат политичките партии, туку самите обвинители“,
истакна Димитров.