Владејачката партија смета дека СДСМ се обидува со неосновани напади да ја мами јавноста, откако опозиционерите денеска обвинија оти шефот на контролата на Наплатната служба на патарините во Петровец, Миланчо Митревски, бил фатен како ја злоупотребува службената положба, за што имало изречено и дициплинска санкција против него.
„СДСМ гледаат колку е подобрена работата на ЈПДП и затоа го напаѓаат Коце Трајановски. Тие гледаат како сега се работи во ЈПДП и со која брзина се реализираат работите, нешто што беше незамисливо во нивно време. Им пречи тоа што во ЈПДП во месец јули оваа година во однос на месец јули минатата година наплатата од патарини е зголемена за 1,1 милион евра“,
велат од ВМРО ДПМНЕ.
На забелешката дека Митревски не ги исполнува условите за функцијата на која е поставен, а единствена квалификација му е тоа што е тврдокорен партиски кадар и сопруг на советничка на ВМРО-ДПМНЕ во Општина Велес, од владејачката партија одговараат дека одговорни за партизацијата се нивните опоненти.
„СДСМ сака да сокрие дека непосредно пред избори во ЈПДП бројот на вработени го зголемиле за 50%, т.е. вработиле нови 150 луѓе. Најголемиот страв, пред сѐ, е заради одговорноста за милионските криминали кои ги правеле, за која знаат дека доаѓа“,
пишува во реакцијата на ВМРО-ДПМНЕ по денешната прес-конференција на социјадемократите.