Злоупотребите, според владејачката партија, биле направени во делот на набавки на лекови кои не се на листата на лекови која со општ акт ја утврдува Фондот, како и во делот на дежурствата
Пратеникот од редовите на ВМРО-ДПМНЕ, Бојан Стојаноски, на денешната прес-конференција во партиското седиште обвини дека по извршените контроли од Фондот за здравство и другите надлежни институции, биле нотирани голем број неправилности во работењето на здравствените установи од страна на директори поставени од поранешната власт, кои, според Стојаноски, работеле само за свој личен интерес.
Тој рече дека при контролите е констатирано оти се извршувале набавки на лекови кои не се на листата на лекови што со општ акт ја утврдува Фондот за здравствено осигурување, на кој министерот за здравство дава согласност, но за нив ЈЗУ нема обезбедено претходна согласност од Министерството за здравство и Фондот, и тоа во здравствените домови во Гостивар и Струга, Клиничката болница во Тетово, општите болници во Струга, Струмица и Дебар, како и на универзитетските клиники за кардиохирургија, нефрологија и психијатрија во Скопје.
„Злоупотреби се правени и во делот на дежурствата. Имено, при контролите евидентиран е случај во ЈЗУ, каде се пресметува и исплаќа додаток за дежурство, но на контролата не ѝ е дадена на увид согласност од Министерство за здравство, за обезбедување непрекинато вршење здравствена дејност со работа со дежурство во: УК за максилофацијална хирургија – Скопје, УК за државна кардиохирургија – Скопје, УК за нефрологија – Скопје, УК за психијатрија – Скопје, Општа болница – Струмица“,
рече Стојаноски.
Дополнително, Стојаноски рече дека времето на злоупотреби во здравството поминало и дека следува одговорност, тврдејќи дека одговорните лица во здравството од СДСМ и ДУИ се однесувале како клиниките и болниците да се нивна своина, без да водат грижа за вработените, средствата и за пациентите.