„Со ова се покренуваат сомнежи за улогата на албанската фирма, кога истата опрема можела да се набави и да биде монтирана директно од фирмата производител. Дали ‘Шанси инвест‘ е фирма која послужила за вадење на профитот од над три милиони евра повеќе од планираното“, велат од партијата
Владејачката ВМРО-ДПМНЕ обвинува дека за време на владеењето на Социјалдемократскиот сојуз (СДСМ) и Демократската унија за интеграција (ДУИ) во компанијата МЕПСО постојат сомнежи и индиции за злоупотреба на три милиони евра.
Во соопштението на ВМРО-ДПМНЕ се вели дека компанијата под раководство на лица од СДСМ и ДУИ склучила договор за набавка на уред за три милиони евра поскап од предвидениот План за развој, што самите го донеле.
„Под водство на Зуди Енуз од т.н. фрон т на ДУИ и поставен од СДС во јуни годинава МЕПСО склучил договор со албанска фирма ‘Шанси Инвест‘ за набавка на уред за корекција на напонски профил на трансформаторска станица. Во Планот за развој на електропреносниот систем на МЕПСО 2021-2030 година, буџетот предвиден за уредот за корекција изнесува 2,8 милиони евра, а во договорот склучен со фирмата истиот уред изнесува 5 864 милиони евра, што е за три милиони евра повеќе од предвиденото“,
се вели во соопштението од ВМРО-ДПМНЕ.
Дополнително, велат од владејачката партија, загрижувачки е што на тендерот албанската фирма учествува со „Далековод“ АД Загреб, фирма за производство на таков вид опрема, која се јавува и како поголем партнер во конзорциумот.
„Со ова се покренуваат сомнежи за улогата на албанската фирма, кога истата опрема можела да се набави и да биде монтирана директно од фирмата производител. Дали ‘Шанси инвест‘ е фирма што послужила за вадење на профитот од над три милиони евра повеќе од планираното“,
велат од партијата.
Го повикуваат Обвинителството веднаш да отвори случај и да истражи во чии џебови завршиле трите милиони евра.