Антикорупциска комисија да испита како е можно да се откупи парцела за една намена, а веднаш потоа да се измени и правилникот кој сега дозволува изградба на бетонска и асфалтна база, бара опозицијата
Одобрение за градба на бетонска и асфалтна база издала општината Охрид минатата седмица, по брза постапка, а по барање на бизнисменот Нефи Усеини, кој беше советник на ДУИ во овој град. Со вакви тврдењеа настапи денеска ВМРО-ДПМНЕ, посочувајќи дека, наместо интустриска зона, Охрид ќе добие бетонска и асфалтна база на Усеини.
„Ветуваа нови инвестиции и работни места кај Мауцкер, но за жал ништо не направија и ги згаснаа последните надежи дека таму некогаш ќе никне современа индустриска зона, со стотици нови вработувања. Георгиески и СДСМ, не само што депонираа илјадници метри кубни шут и ѓубре, туку деновиве исплатија и нова фактура за овој циклус дадени услуги на нивниот вечен доверител Нефи Усеини .Изминатата недела општина Охрид и Георгиески работеа само за еден човек. Експресно, за само неколку часа, беше издадено одобрение за градба на бетонска и асфалтна база. Се враќаа вработени од одмори, а некои работеа и од дома, само да се задоволи барањето на Усеини, додека граѓаните чекаат и по две години да добијат едно обично одобрение за градба“,
изјави, на прес-конференција, Сашо Донев од ВМРО-ДПМНЕ.
Тој вели дека градежната парцела кај Мауцкер Усеини ја откупил за багателна сума, од 71 денар по метар квадратен, според која градежното земјиште било наменето за лесна и незагадувачка индустрија и не се предвидела изградба на бетонска и асфалтна база.
„Антикорупциска комисија да испита како е можно да се откупи парцела за една намена, а веднаш потоа да се измени и правилникот кој сега дозволува изградба на бетонска и асфалтна база? На каков начин е спроведена постапка за отуѓување на градежното земјиште, свесно оштетувајќи ги буџетите на Охрид и на државата? Дали свесно се тактизираше за да не пројават интереси други инвеститори, што би значело и повисока продажна цена на земјиштето“,
прашува Донев.