Во врска со седницата на Комисијата за прашања на изборите и именувањата за избор на уставни судии, тој очекува дека истата ќе продолжи, а претходно и од пратеничката група на СДСМ и од кабинетот на Џафери најавија дека продолжение ќе има утре. Седницата на оваа Комисија е една од најважните во овој период, со оглед дека од нејзино завршување зависи и дали Уставниот суд наскоро ќе биде блокиран
Од ВМРО-ДПМНЕ денеска не присуствувале на координацијата кај претседателот на Собранието, Талат Џафери, бидејќи сметаат дека тој досега не се придржувал до она што било договарано и ги менувал одлуките во договор со партиите од власта.
Вакво објаснување во изјава за државната агенција МИА дава координаторот на пратеничката група на ВМРО-ДПМНЕ, Никола Мицевски, откако денеска не се појави на координацијата којашто е прва по колективниот одмор на пратениците.
„Не гледаме причини да одиме. Она што се договараме понеделнички на координација веќе во вторник не важи“,
вели Мицевски.
Во изјавата тој најавува дека нивната пратеничка група ќе продолжи со активната блокада во Собранието, но нема да ги кочи законите кои се во интерес на граѓаните.
Со оглед дека не сакаат да присуствуваат на понеделничките консултации, на прашањето како ќе се договараат за работата и функционирањето на Собранието и дали имаат неформални средби со Џафери, Мицевски рече дека за тоа ќе се договараат претседателите на комисиите и пратениците, кои редовно се информираат меѓусебно.
Во врска со седницата на Комисијата за прашања на изборите и именувањата за избор на уставни судии, тој очекува дека истата ќе продолжи, а претходно и од пратеничката група на СДСМ и од кабинетот на Џафери најавија дека продолжение ќе има утре.
Седницата на оваа Комисија е една од најважните во овој период со оглед дека од нејзино завршување зависи и дали Уставниот суд наскоро ќе биде блокиран. Овој суд во моментов функционира со пет од вкупно девет предвидени судии, но на еден судија мандат му истекува за околу три месеци што значи дека ако до тогаш не се изберат нови судии, Уставен ќе нема ниту кворум за одржување седници.
Седницата на собраниската комисија на чиј дневен ред се предлозите за нови уставни судии треба да резултира со утврдени предлози за тројца судии кои потоа треба да бидат изгласани и на пленарна седница со цел да пополнат три слободни столчиња во Уставен кои се испразнија во мај 2021 г.
За нивно пополнување на собраниската Комисија започна седница уште во јуни лани, но поради несогласувања помеѓу власта и опозицијата, локалните избори во октомври 2021 и промените во владејачкото мнозинство и во составот на Комисијата постојано се пролонгираше. Расправата за уставни судии конечно започна во мај годинава кога СДСМ даде три, а ВМРО-ДПМНЕ шест предлози. Од нив, дебата и гласањето во рамки на Комисијата досега заврши само за двајца: за апелацискиот судија Фатмир Скендер кој е предлог на власта и доби мнозинство гласови „за“ во Комисијата, и за професорката Родна Живковска која е предлог на ВМРО-ДПМНЕ и која не ја доби поддршката од собраниското тело.
Расправата е застаната кај кандидатката Татјана Васиќ, предлог на власта, а потоа треба да се дебатира и за предлогот на СДСМ републичкиот обвинител Љубомир Јовески да стане уставен судија, како и за преостанатите пет предлози од опозицијата: пензионираниот професор Саво Климовски, шефот на Вишото обвинителство Штип Тодор Витларов охридскиот обвинител Воислав Димоски, управната судијка од Битола Весна Јовановска и пензионираниот гостиварски судија Бранко Секулоски.