Партијата обвини за неспособност на менаџментот на ФЗО поради двонеделниот колапс на системот, а од премиерот Ковачевски побара разрешување на еден од директорите на Фондот, Фатон Ахмети, кому, како што посочија, поважен му е политичкиот ангажман во ДУИ и патувањето во САД отколку функцијата за која е платен од граѓаните
Посетата на директорот на ФЗО, Фатон Ахмети, на САД, според опозициската ВМРО-ДПМНЕ, тој не ја прави од позиција на директор на Фондот, туку од лични причини. Партијата обвини дека тој е во политичка посета на Соединетите Држави како кадар на ДУИ, притоа, како што велат, сакајќи на тој начин политички да се надгради.
„Фрапантно е што две недели Фатон Ахмети не најде за сходно да го прекине својот политички престој и додека податоците на осигурениците, нивните лични информации и дијагнози се загрозени, тој како член на ДУИ остана на политички престој. За ДУИ и СДС државата и нејзиното функционирање се секогаш во втор план“,
обвинија од ВМРО-ДПМНЕ.
Ваквата постапка на директорот на ФЗО, додаваат од партијата, покажува оти за него политичкиот ангажман во ДУИ е поважен од државната функција што ја извршува и за која е платен од граѓаните.
Реакцијата на ВМРО-ДПМНЕ следува откако вчера вториот директор на Фондот за здравствено осигурување (ФЗО), Фатон Ахмети, објави дека причината за неговото отсуство на брифингот со новинарите на кој присуствуваше директорката на Фондот, Магдалена Филиповска-Грашкоска, е неговата посета на САД која била одамна испланирана. Тој посочи дека во САД не е на годишен одмор, туку дека таму престојува на покана на Стејт департментот на програмата ИВЛП (Интернационална програма за лидерство на посетители).
ВМРО-ДПМНЕ обвини за неспособност на менаџментот на ФЗО поради двонеделниот колапс на системот на Фондот, нагласувајќи оти тој е сè уште под опасност и има можност од исчезнување на податоците.
„Ковачевски наместо да молчи и да прави квазиреконструкции на Владата, треба веднаш да го разреши Фатон Ахмети од позицијата директор на ФЗОМ, а доколку не го направи тоа, само ќе стави печат на фактот дека е заложник на ДУИ, со чија помош сè уште се држи на власт“,
заклучија од ВМРО-ДПМНЕ.
Инаку, отсуството на Фатон Ахмети од вчерашниот брифинг со новинарите се случува во период кога Фондот беше на удар на хакерски напад и се соочува со враќање во нормала на ИТ-системот. Хакерскиот напад предизвика големи проблеми во дејствувањето на институцијата. Поради нападот, здравствените работници не ја добија јануарската плата, а аптеките не можеа да ги услужат осигурениците со лекарства навреме.