Опозицијата ги смета за обид за насилно одење на избори укажувањата на владејачката партија дека, практично, е невозможен изборен бојкот затоа што веќе се утврдени кандидатските листи за пратеници
Со оглед на пропорционалниот модел и Донтова формула за пресметување на мандатите, теоретски, е возможно ВМРО-ДПМНЕ, и во случај да ги повика своите поддржувачи да не излегуваат на гласање, да добие пратенички места во новиот собраниски состав
Како обид за насилно одење на избори, ги оценува ВМРО-ДПМНЕ укажувањата од СДСМ дека опозицијата не е во ситуација да не учествува на можни избори во јуни, затоа што уште во март се утврдени кандидатските листи за пратеници и редоследот на партиите на изборното ливче.
„Во контекст на коментарот на портпаролот на СДСМ во делот за организирање на избори, каде што секако ќе нѐ има на гласачкото ливче, морам да потенцирам дека ова е сериозна работа. Не можеме да лицитираме со такви сериозни одлуки во делот на насилно одење на избори. Морам да потенцирам дека по тоа прашање веќе беше јасен и во вчерашното излагање претседателот Мицкоски, каде што јасно и гласно кажа кој е нашиот став во однос на одење на избори, сега во јуни, по желба на СДСМ“,
изјави на денешната прес-конференција портпаролот на ВМРО-ДПМНЕ, Димче Аровски, одговарајќи на новинарско прашање во врска со изборите.
Претходно, портпаролот на СДСМ, Костадин Костадинов, изјави дека токму Мицкоски се согласи за избори на 12 април и токму ВМРО-ДПМНЕ гласаше за распуштање на Собранието, поддржаа распишување на изборите, влезе во техничка влада, поднесе пратенички листи, стави печат на кандидатските листи, учествуваше во ждребувањето, и дури имаат и свое бројче на гласачкото ливче…
„Сега, Мицкоски единствено може да избира дали ќе води изборна кампања или нема да води изборна кампања, а неговата партија во секој случај ќе се најде на избирачкото ливче. Сега, Мицкоски единствено може да избира дали ќе води изборна кампања или не, а неговата партија во секој случај ќе се најде на гласачкото ливче. СДСМ е одговорна партија и, како и досега, дава шанса на консензусот за важни прашања, но доколку нема договор и доколку продолжи незрелоста и неодговорноста на Мицкоски, тогаш по сила на закон, изборите ќе се одржат на 21 јуни, односно 22 дена по истекот на вонредната состојба на 30 мај, во случај да не се продолжи“,
изјави Костадинов.
Со оглед на тоа што парламентарните избори се според пропорционален модел, а мандатите се пресметуваат по Донтова формула и не е утврден праг за излезеност, теоретски, е возможно ВМРО-ДПМНЕ, и во случај да ги повика своите поддржувачи да не излегуваат на избори, да освои пратенички мандати во новиот собраниски состав. Со оглед на тоа што кандидатските листи на коалицијата на ВМРО-ДПМНЕ би фигурирале на гласачките ливчиња, избирачите кои ќе излезат на изборите ќе може да го заокружат бројчето на опозициската партија.
Хронологија
На почетокот на 2013 година, СДСМ, како опозициска партија, размислуваше за бојкот на локалните избори што се одржаа таа година, поради исфрлањето на опозицијата од собраниската сала на 24 декември 2012 година. Сепак, тогаш сѐ уште не беа доставени кандидатурите за градоначалници и за советници во ДИК.
Бојкотот на ВМРО-ДПМНЕ на референдумот за името во 2018 година, пак, придонесе за излезеност од близу 37 проценти, наспроти предвидениот цензус од 50 отсто плус еден.
Средба на ДИК со Комисијата за заразни болести
И додека партиите се обидуваат да постигнат консензус околу новиот датум за одржување на изборите, за што првиот можен рок е 21 јуни, денеска имало средба меѓу членовите на ДИК и на Комисијата за заразни болести. Како што појасни министерот за здравство Венко Филипче, членовите на ДИК присуствувале на дел од денешниот состанок на Комисијата, која подготви протокол за спроведување на изборите во услови на епидемија.
Според Филипче, членовите на ДИК ги изнеле своите размислувања и поставиле дополнителни прашања во врска со протоколите за избори. Во следните денови, како што рече Филипче, Комисијата ќе одговори на прашањата, а исто така рече дека државата, би можела да одговори на потребата за заштитни материјали за изборите имајќи предвид дека станува збор за голема бројка.