„Само Левица и Апасиев можат да купат деловен објект одземен преку извршител од некој граѓанин или фирма кои не можеле да го враќаат кредитот, за трипати пониска цена од пазарната… Левица и Апасиев се демаскирани, аскетизмот одамна го замениле со хедонизам, ако воопшто и некогаш биле аскети“, рече на прес-конференција членот на ИК на ВМРО-ДПМНЕ, Валентин Манасиевски
Владејачката ВМРО-ДПМНЕ денеска ја обвини опозициската Левица и нејзиниот лидер Димитар Апасиев дека во директен договор со извршител и банка купиле конфискуван имот за трипати пониска цена.
Обвинувањата на владејачката партија доаѓаат како продолжие на вербалната пресметка што во четвротокот на седницата за пратенички прашања од опозицијата во Собранието ја имаа лидерот на Левица и премиерот Христијан Мицкоски, кој покажа, како што кажа, документ кој покажува дека партијата купила деловен имот во адвокатската улица по пониска цена за квадратен метар и обвини дека станува збор за кривично дело.
Денеска членот на Извршниот комитет на ВМРО-ДПМНЕ, Валентин Манасиевски, на прес-конференција рече дека Левица и Апасиев биле фатени „ин флагранти“ во зделка на деценијата, на која можат да ѝ позавидат многу светски инвеститори.
„Само Левица и Апасиев можат да купат деловен објект одземен преку извршител од некој граѓанин или фирма кои не можеле да го враќаат кредитот, за трипати пониска цена од пазарната. Левица и Апасиев кои декларативно беа против извршителите, не се колебаат да купат одземен имот, од истите тие извршители. Уште поголем проблем е ставот на Левица дека извршителот немал ништо со преговорите, туку дека тие се договориле со банката и објектот го земале со хипотекарен кредит“,
рече Манасиевски.
Во таа насока, тој праша и ако од опозициската партија се договарале со банката, како ја постигнале таа цена, кога во околината се продава имот за трипати повисока цена и дали има некој скриен договор или друга услуга која не е заведена со договор.
„Левица и Апасиев се демаскирани, аскетизмот одамна го замениле со хедонизам, ако воопшто и некогаш биле аскети“,
рече членот на Изршниот комитет на ВМРО-ДПМНЕ.
Премиерот и лидер на ВМРО-ДПМНЕ, Мицкоски, во четвртокот одговарајќи на обвинувањата на лидерот на Левица дека со изјави во медиумите ја компромитирал истрагата за трагедијата во Кочани, на собраниската говорница извади фотографија од зграда и го праша дали знае кој е тој е објект.
„Кога станува збор околу кривичните дела, би сакал Апасиев да го прашам дали му е познат овој објект во центарот на Скопје. Во овој објект има еден договор за купопродажба на недвижен имот на политичката партија Левица. Политичката партија Левица со овој договор на 26.11.2024 година купила деловен имот од 409 квадратни метри на адвокатската улица, верувале или не за цена од 295 илјади евра со ДДВ или просечно квадратот на овој објект во центарот на Скопје е 721 евро, согласно овој договор. За какво кривично дело ова е, професоре?“,
рече Мицкоски.
Премиерот Мицкоски во таа пригода ги повика министерот за внатрешни работи и Финансиската полиција да проверат дали има основа за кривично дело, дали политичката партија Левица потпишувајќи го овој договор за купопродажба сторила кривично дело така што го купила тој простор по цена од 721 евро за квадратен метар.
Апасиев на ова одговори дека тоа што Мицкоски не дал одговор на прашањето, туку само, како што рече, рипал од тема на тема, стручно се вика синдром на дива коза или, уште постручно, вербална дијареја.
Тој за обвинувањата од Мицкоски побара од него да му поднесе кривична пријава додавајќи дека тој ќе го направи истото во текот на наредната недела.