Власта и во пелетите виде бизнис, па гледаме како се распродава дрвна маса по 10 пати пониска цена од пазарната на фирми блиски до власта, за тие потоа да направат пелети и да инкасираат милионски добивки, рече Трипуновски
ВМРО-ДПМНЕ денеска излезе со ново обвинување за функционер од владејачката СДСМ. Цветан Трипуновски, претседател на комисијата за земјоделство, шумарство и водостопанство на ВМРО-ДПМНЕ, на денешната прес-конференција, обвини дека фирма за пелети блиска до министерот за земјоделство Љупчо Николовски купува дрва од „Македонски шуми“ 10 пати поевтино од народот и книжи милиони. Трипуновски го повика Јавното обвинителство да отвори истрага за овој случај.
„Слабата реализација на ЈП „Македонски шуми“ кое оваа година не обезбеди ниту 20 отсто од потребната дрвна маса, што e далеку од потребната количина, ако се земе предвид дека во државата скоро 50 отсто од домаќинствата огревното дрво го користат како главен енергенс, покрај тоа што има за цел да ги насочи купувачите кај одредени приватни стоваришта, ја вивна и цената на дрвната маса во плафон, што резултираше со поскапување на цената и на пелетите“,
рече Трипуновски.
Власта, додаде тој, и во пелетите виде бизнис, па гледаме како се распродава дрвна маса по цена 10 пати пониска цена од пазарната на фирми блиски до власта, за истите потоа да направат пелети и да инкасираат милионски добивки.
Трипуновски објави еден од договорите што ЈП „Македонски шуми“ го склучило со фирмата „Еко лајф“ ДООЕЛ за сеча во Свети Николе.
„Ова е фирма која важи за блиска до Љупчо Николовски. Со овој договор ЈП ‘Македонски шуми’ продава 3 165 кубни метри дрвна маса по цена за кубен метар од 300 денари за чемпрес и 525 денари за црн бор. Еден кубен метар дрвна маса по цена од 300 и цена од 525 денари, за фирма блиска до власта во услови кога еден кубен метар огревно дрво се продава и по цена над 5 000 денари“,
рече Трипуновски.
Според него, доколку власта навистина водела грижа за граѓаните, тогаш ова дрво наместо да им се понуди на граѓани со ниски примања, кои не можат да си дозволат да се снабдат со доволна количина огревно дрво, за полесно да ја поминат зимата, ѝ се дава на фирма блиска до власта и Николовски.
Но, додаде тој, очигледно е дека на власта не ѝ е приоритет народот кој не може да си купи дрва и едвај преживува, туку бизнисот и процентите.
Трипуновски рече дека вкупната цена на дрвната маса од договорот е 1 578 250 денари за 3 165 кубни метри, и според пресметките ќе се добие околу 650 000 килограми пелети.
„Ако оваа количина ја помножиме со цена од 30 денари за килограм пелети, доаѓаме до сума од 19 500 000 денари. Дополнително, истата фирма има добиено договор за сеча во Делчево за 35 000 кубни метри дрво, од што би се добиле над 7 милиони килограми пелети, или ако се земе предвид дека просечната цена на еден килограм пелети е околу 30 денари, фирмата ќе инкасира над 200 милиони денари. Само со овие два договори, власта овозможува чиста заработка од над 3 и пол милиони евра за фирмата ‘Еко Лајф’ блиска до Љупчо Николовски и СДС“,
додаде Трипуновски.
Тој го повика Јавното обвинителство да отвори случај и да утврди зошто ЈП „Македонски шуми“ не обезбедило доволно дрвна маса во своите складишта.
„Зошто реализацијата е скоро четирипати помала од време кога ВМРО-ДПМНЕ беше на власт? Дали зад сето ова се крие бизнис со цел вештачко кревање на цената на огревното дрво и пелетите и овозможување бизнис за фирми блиски до власта? Дополнително, Николовски наместо да бега мора да одговори зошто ги остави граѓаните и домаќинствата на самиот почеток од грејната сезона без огревно дрво, а прашање е дали воопшто и ќе го има до крајот на зимата“,
рече Трипуновски.