Опозициската ВМРО-ДПМНЕ се сомнева дека специјалната јавна обвинителка го искористила боледувањето за да ја напушти државата. Поради тоа, претседателката на Унијата на жени на партијата Благица Ласовска побара објаснување, од што боледува Јанева и кој и го издал боледувањето.
„Прво, како е возможно специјалната обвинителка Катица Јанева да се разболи во истиот ден кога излезе овој скандал па со два дена задоцнување да разбереме дека отворила боледување? Која здравствена установа и го издала ова боледување и дали Комисија од Фондот за здравство ја проверила веродостојноста на боледувањето. Со оглед на тоа што Катица Јанева четири дена бега од соочување со јавноста да даде одговори за сомнежите кои се врзуваат за неа, објективно е да се сомнева дека таа веќе ја напуштила државата злоупотребувајќи го оправдувањето со боледување.“
бараат одговори од ВМРО-ДПМНЕ.
Опозицијата бара одговори и од обвинителството. Едно од прашањата е дали е повикан на распит и Лазар Јанев, синот на специјалната обвинителка кој беше вработен во 1ТВ на Боки 13.
Прес-конференцијата на Ласовска не е единствената денешна реакција на опозицијата на случајот „Рекет“. Меѓу другото, партијата направи и мини-герила акција.
„За нејзино што поскоро враќање и оздравување, во име на граѓаните, на Катица Јанева и оставаме чанта од марката на Луј Витон. Не е баш оригинал какви што си купува нејзиниот пријател Боки 13 но се наоѓа на пазарите во Македонија. Прочитавме дека нејзините драги лица ги обожаваат овие марки на чанти, а особено кога се наполнети со по милиони евра. Се надеваме дека таа ќе побрза да дојде да си го подигне подарокот. Патем чантата не тежи многу и во неа нема пари, туку само парчиња безвредна хартија со ликови на оние за кои се зборува дека се вмешани во рекетот.“
објаснуваат партиските активисти.