„Македонските граѓани заслужуваат да ги водат луѓе со интегритет кои ќе се грижат за нивниот живот и здравје, а не луѓе кои поради нивната неодговорност, животот им го ставаат во опасност“, велат од ВМРО-ДПМНЕ
Владејачката ВМРО-ДПМНЕ смета дека општинската власт во Гостивар целосно потфрлила во своето работење и на граѓаните не успеала да им го обезбеди елементарното право на чиста вода за пиење.
Потенцираат дека ова се случува во 21 век кога, како што велат, светот зборува за брз технолошки развој и вештачка интелигенција.
„ВМРО-ДПМНЕ бара итно расчистување на случајот и одговорност за сите инволвирани кои несовесно, непрофесионално и неодговорно ги извршувале своите работни активности. На Македонија и на македонските граѓани потребни им се одговорни лица кои достојно, професионално, одговорно и во нивен интерес ќе ги извршуваат функциите за кои се избрани. Македонските граѓани заслужуваат да ги водат луѓе со интегритет кои ќе се грижат за нивниот живот и здравје, а не луѓе кои поради нивната неодговорност, животот им го ставаат во опасност“,
велат од ВМРО-ДПМНЕ.
Од партијата потсетуваат дека претседателот на опозициската СДСМ, Венко Филипче, на минатите локални избори го повикувал членството да гласа за кандидатот Ваљбон Лимани кој е актуелен градоначалник на Гостивар.
„’Апелирам да мобилизираме што повеќе членовите и да му дадеме поддршка на Ваљбон’, го повикуваше Венко Филипче членството на СДС во Гостивар да даде поддршка за кандидатот Ваљбон Лимани за градоначалник на минатите локални избори. Но, неспособноста на ваквите кадри поддржани од СДС и Венко Филипче станува опасна по животот и здравјето на македонските граѓани. Потврда за ова е и последниот случај од Гостивар каде поради нестручно, непрофесионално и неодговорно поставени пумпи на општината и гостиварски ‘Водовод’ во отпадни води, изминатите денови над 1 000 граѓани се затруле и побарале медицинска помош“,
велат од партијата.