Шведскиот министер за цивилна одбрана кажа дека доколку има рестрикции, најверојатно ќе се работи за неколкучасовен прекин на струја, но додаде дека не се искучува опцијата ниту за подолги прекини во снабдувањето
Властите во Шведска ги предупредија граѓаните и компаниите да се подготват за можни прекини во снабдувањето со струја во текот на зимата поради исклучувањето на нуклеарниот реактор, студеното време и недостатокот на енергија во Европа по намалувањето на извозот на рускиот гас, објави Ројтерс.
„Ризикот од прекини на струја е реален и Швеѓаните мора да се подготват за тоа“,
рече министерот за цивилна одбрана Карл Оскар Болин на прес-конференција и додаде оти Шведска никогаш претходно не била во ваква ситуација.
Министерот истакна дека доколку има рестрикции, најверојатно ќе се работи за неколкучасовен прекин на струја, но додаде дека не се искучува опцијата ниту за подолги прекини.
„Не се обидуваме да алармираме. Подобро е да се биде подготвен отколку да не се биде“,
истакна Болин.
Компанијата „Ватенфал“, која одржува електрани во Шведска, на почетокот на декември најави дека до 23 февруари ќе го одложи повторното поврзување на мрежата на нуклеарниот реактор Рингхалс 4, што предизвика неизвесност во снабдувањето со електрична енергија на целиот нордиски регионот.
Претходно овој месец, шведската влада ги повика граѓаните да трошат помалку електрична енергија, а властите им препорачаа на граѓаните да ги одржуваат батериите и батериските ламби, да ги зачуваат радијата и да складираат храна и флаширана вода.
Во случај на прекин на електричната енергија, домаќинствата треба да одредат просторија во која семејството ќе може да престојува и да ја одржува температурата за време на студеното време, изјави шведскиот министер за цивилна одбрана.
Шведската влада минатата недела соопшти дека побарала од националниот оператор на електричната мрежа и енергетскиот регулатор на земјата да ја интензивираат нивната работа за зајакнување на безбедноста на снабдувањето со електрична енергија и на краток и на долг рок.