„За членот 41 ние ќе отвориме дебата во парламентот, да се изјаснат сите, ќе ги слушнеме и граѓаните. Секако за уставноста владата и парламентот мора да внимаваат, но на крајот решенијата треба да донесат и конечна одлука која ќе ја носиме заедно со граѓаните и парламентот“, вели Заев
„Ние ќе донесеме закон којшто ќе биде уште порестриктивен. Јас верувам дека ќе се согласиме сите политички партии во Собранието, заедно со НВО за закон којшто ќе биде прифатлив за граѓаните“, ветува Бочварски
Власта има намера да ја прифатиме сугестијата за строга забрана за легализација на дивоградбите во националните паркови и заштитени подрачја на строга заштита и во подрачјата на втората зона на условена заштита, додека за контроверзниот член 41 со кој се предвидува запирање на кривичните и граѓанските постапки за бесправно градење вели ќе отвори дебата.
Вакви пораки денеска испрати премиерот Зоран Заев, откако владата утрово одлучи да го повлече контроверзниот Закон за легализација на дивоградбите, кој доби вето од претседателот Стево Пендаровски, и да поднесе нов во кој ќе ги вгради сугестиите на експертите и граѓанскиот сектор.
„Владата го овласти министерот за транспорт да отвори јавна дебата со граѓаните, граѓанските организации и парламентарните групи и сите укажувања да бидат вградени. Прво, тоа што стига е сите куќи кои се дом на живеење заклучно со 1 мај 2021 година да ја добијат можноста за легализација. Второто укажување кое стигна е целосна забрана во националните паркови и заштитните региони односно недовербата во институцијата да издаде позитивно или негативно мислење за градење или легализирање во заштитените подрачја и национални паркови. Затоа имаме намера да ја прифатиме сугестијата за строга забрана во националните паркови и заштитени подрачја на строга заштита и втората зона на условена заштита. Истовремено, даваме можност за сите оние кои не се колективни згради, да доколку не им е дом за живеење со дупло плаќање на комуналии да може да легализираат“,
изјави Заев.
Како што не се планирани легализации на дивоградбите во заштитеното подрачје согласно управувачкиот план во охридскиот регион заради УНЕСКО, потенцираше Заев, така нема да се легализираат ниту дивоградбите од проектот „Скопје 2014“.
„Нема легализација заради тоа што се работи за катни објекти, не се индивидуални домови. Се работи за катни објекти, коишто не се вградени во самиот закон. Секако соодветно тоа се однесува и на Охрид. При тоа да се знае, надвор од заштитеното подрачје во Охрид, на зоните коишто се дозволени, надвор од планот за управување со Охрид, е дозволиво легализирање, секако ако има останато нелегални градби“,
рече Заев.
За членот 41 Заев потенцираше дека целта е да има еднаквост пред Уставот односно дека не може да дозволите некој да легализира објект што е изграден 2019-2020, а од друга страна да се гони кривично некој за објект од 2015-2016 година. Исто така, тој вели дека тоа не значи дека оти судските процеси ќе паднат во вода, затоа што би паднале само деловите за бесправно градење, додека останатите делови од обвиненијата ќе си опстојат.
„За членот 41 ние ќе отвориме дебата во парламентот, да се изјаснат сите, ќе ги слушнеме и граѓаните. Секако за уставноста владата и парламентот мора да внимаваат, но на крајот решенијата треба да донесат и конечна одлука која ќе ја носиме заедно со граѓаните и парламентот“,
рече Заев.
Министерот за транспорт и врски, Благој Бочварски посочи дека не е сигурен дека општините пред да се донесе законот имаат капацитет да направат регистар на дивоградбите кои ги исполнуваат условите или не, туку, како што рече, со носењето на законот граѓаните ќе аплицираат и потоа општините ќе оценуваат што може, а што не, да се легализира.
„Ние ќе донесеме закон којшто ќе биде уште порестриктивен. Јас верувам дека ќе се согласиме сите политички партии во Собранието, заедно со НВО за закон којшто ќе биде прифатлив за граѓаните, а веднаш потоа сите граѓани коишто ги исполнуваат сите услови ќе можат да аплицираат до матичните општини за нивните објекти да бидат ставени во правна рамка и тогаш при нивната апликација ние ќе ги преброиме колку се тие објекти, колку исполнуваат услови, ќе бидат решени, а оние кои не исполнуваат услови ќе бидат одбиени. Така да сметаме дека со затекнатото законско решение коешто ќе го донесеме ќе придонесеме да се увиди при апликацијата колку од тие објекти можат да бидат ставени во правна рамка“,
истакна Бочварски.
Премиерот и министерот и денеска потенцираа дека целта на законот е да се овозможи граѓаните кои досега не можеле да си ги легализираат куќите да го направат тоа, но паралелно да се легализира и државната инфраструктура бидејќи има нелегализирани водоводи и канализации, локални патишта, споменици на културата, објекти од енергетиката, детски градинки, училишта, болница итн.