Владата оди на сценариото „Б“ во НАТО-интеграциите – план кој предвидува договорот за пристапување на Северна Македонија во Алијансата наскоро да се ратификува во Собранието, но да се депонира во Стејт департментот во Вашингтон откако шпанскиот парламент ќе се согласи земјава да стане 30-та членка на НАТО.
На денешната владина седница бил утврден текстот на Предлог-законот за ратификација на Северноатланскиот договор потпишан во Вашингтон на 4 април 1949 година.
„Предлог-законот за ратификација на Северноатланскиот договор на нашата земја со НАТО, кој ќе биде пратен на усвојување во Собранието на РСМ, се предвидува да стапи во сила со денот на објавувањето во ,Службен весник на Република Северна Македонија’, по што ќе биде депониран во Вашингтон, откако Шпанија ќе го ратификува Протоколот за пристапување на нашата земја во полноправно членство во Алијансата“,
пишува во соопштението од денешната владина седница.
Овој чекор на владата во заминување во Скопје е изнуден од политичката криза во Мадрид поради неизвесноста дали Педро Санчез, в.д. премиер и лидер на Социјалистите кои освоија најмногу пратенички места на изборите во ноември, ќе успее во напорите да формира коалициска влада. Санчез има договор со „Подемос“, левичарска партија која се залага за прекинување на острите економски реформи во земјата, како и поддршка од помалите регионални партии. Но, имајќи предвид дека конзервативната Народна партија, центристичката Сиудаданос и крајно-десничарската Вокс се против, на Санчез ќе му треба некаква поддршка и од Републиканската Каталонска партија, макар и да отсуствува од седницата кога ќе се гласа за идната влада.
Проблем во оваа сложена политичка равенка е што односите меѓу Каталонската партија и Социјалистите на Санчез се далеку од добри поради фактот што лидерот на Каталонците, Ориол Хункверас, беше осуден на 13 години затворска казна поради организирањето на референдумот за независност на Каталонија. Но, и покрај сериозните разлики, стравот од растот на екстремната десница ги турка и двте страни во разговорите – Социјалистите и Каталонците кон можен договор. Проценките се дека тоа може да се случило веќе во наредните денови.
Сепак, владата во Скопје, како што вчера најави и вицепремиерката и министерка за одбрана, Радмила Шеќеринска, ќе преземе се за навремено завршување на процесот на пристапување во НАТО во наредните неколку месеци. Таргетот е тоа да финишира пред априлските избори. За да не се остави работата на случајност, владата денеска реши пристапувањето во НАТО да помине во Собранието, а да се депонира во Вашингтон откако ратфикацијата ќе се затвори во парламентот во Мадрид.