Од Министерството за земјоделство, шумарство и водостопанство информираат дека исто така се работи на нов модел за преструктуирање на претпријатието, кој треба да ја подобри и зголеми ефикасноста на вработените
Министерството за земјоделство, шумарство и водостопанство (МЗШВ) денеска соопшти дека Владата веќе одобрила дополнителна финансиска помош за АД „Водостопанство“ до 200 милиони денари, околу 3,2 милиони евра, и дека во меѓувреме се работи на нов модел за преструктуирање на претпријатието.
„Министерството за земјоделство, шумарство и водостопанство и Владата одговорно го разгледуваат прашањето со обезбедување на дополнителни финансиски средства за АД ‘Водостопанство’. Владата веќе одобри дополнителна финансиска помош за АД ‘Водостопанство’ до 200 милиони денари со кои ќе се реши овој проблем. Исто така се работи на нов модел за преструктуриање на АД ‘Водостопанство’, кој треба да ја подобри и зголеми ефикасноста на вработените“,
стои во соопштението од МЗШВ.
Оттаму напоменуваат на околноста дека АД „Водостопанство“ е посебен орган кој работи самостојно со сопствен буџет и министерството за земјоделство, шумарство и водостопанство нема никаква законска можност за распределба или управување со нивните средства, особено за платите кон вработените.
„Меѓутоа како никогаш до сега МЗШВ вложува во изградба на нови системи за наводнување. Преку сите започнати нови капитални инвестиции во овој период обезбедуваме наводнување за нови 20.000 хектари земјоделски површини. Се гради браната Конско, а работиме на проектот за наводнување на јужната долина на реката Вардар. Со поддршка на ЕУ се градат седум мали нискотрошковни системи за наводнување во Конопница, Теарце и Пишица, системите Чаушица и Славишко Поле се веќе завршени, а следуваат системите Сопот и Новаци“,
велат од Министерството.
Според МЗШВ преку развојната банка KfW се обезбедени дополнителни 120 милиони евра со кои се подготвува проектна документација за системите Конско, Лисиче, Страиште, Пепелиште за наводнување на вкупно 15.500 хектари земјоделско земјиште.
Со ребалансот на буџетот за 2022 година дополнителни 450 милиони денари се предвидени за реализација на капитални инвестиции во делот на водоснабдувањето за проектите Конско, Равен – Речица и Речани, додаваат од МЗШВ.