Владата распиша јавна набавка за заштитни маски со цел спречување на последиците од коронавирусот. Право на учество на јавниот повик имаат сите домашни производители кои ги исполнуваат условите да испорачаат на најмалку 2 000 маски дневно, кои ќе бидат за повеќе употреби и треба да може да се перат. Испораката да се врши за период на траење на вонредната состојба, на различни локации во Скопје.
„Единечната цена по маска да изнесува максимум 40 денари плус данок на додадена вредност за маските изработени од материјал за изработка во сопственост на економскиот оператор. Единечната цена по маска да изнесува максимум 25 денари плус данок на додадена вредност за маските изработени од материјал обезбеден од страна на Владата на Република Северна Македонија. За материјалот од кој ќе се изработуваат заштитните маски потребно е да се поседува соодветен сертификат за квалитет издаден од страна на овластена лабораторија“,
се вели во повикот.
Јавниот повик ќе трае 24 часа од моментот на објавувањето, а понудите треба да се достават по пошта или лично до архивата на Владата.
„Комисија составена од 3 (три) члена од редовите на Генералниот секретаријат ќе извршат оценување на способноста на понудувачите согласно бараните услови во повикот и ќе предложат избор до Одговорното лице. Економскиот оператор кој ќе достави понуда и ќе склучи договор, доколку не го исполни предметот на набавката според квалитет и квантитет ќе добие негативна референца за учество на јавни набавки“,
се вели во јавниот повик.