Владата на денешната седница, која е сè уште во тек, дискутира по предлогот како да се организира полицискиот час и движењето од петок до понеделник. Министерот за здравство Венко Филипче на редовната прес-конференција рече дека има повеќе опции кои ќе бидат објавени по седницата.
Филипче не одговори директно на прашањето дали се планира воведување на 24-часовен полициски час, туку само рече дека разгледуваат две опции, од кои едната предвидува продолжување на полицискиот час, а другата, како што рече, е уште поригорозна, но не кажа детали и најави дека одлуката дополнително ќе биде соопштена.
Одговарајќи на новинарско прашање, дали поради тоа што најголем број од заболените се од Скопје се размислува за некакви поригорозни мерки, Филипче потврди дека токму она за што Владата одлучува денеска се однесува на Скопје, во смисла на дополнително ограничување на комуникацијата, на социјалните контакти и транспортот, кои би се однесувале на викендот, додека од понеделник би важеле други мерки.
Тој потенцира дека сите лица што се дијагностицирани во Скопје биле во самоизолација и тие ја почитувале мерката.