Граѓаните имаа оправдани дилеми поради што неколку пати за ова се обраќаат до централните институции, Општина Карпош и до меѓународната заедница. Во директна комуникација со граѓаните на Бардовци, Владата ги уважува нивните аргументи и во транспарентна постапка ќе бара нова локација надвор од населено место со цел реализација на овој важен проект, се наведува во објавата на фејсбук-профилот на Владата
Владата на денешната седница донесе одлука за стопирање на изградбата на Прифатниот центар за странци во Бардовци и негово преместување на локација надвор од населено место. Ова, како што е објавено на фејсбук-профилот на Владата, доаѓа како одговор на барањето на граѓаните од Бардовци и Волково кои со месеци протестираа против изградбата на центарот.
„Граѓаните имаа оправдани дилеми поради што неколку пати за ова се обраќаат до централните институции, Општина Карпош и до меѓународната заедница. Во директна комуникација со граѓаните на Бардовци, Владата ги уважува нивните аргументи и во транспарентна постапка ќе бара нова локација надвор од населено место со цел реализација на овој важен проект“,
пишува во објавата на Владата на ФБ.
За тоа што ќе биде овој објект имаше доста шпекулации. Почнувајќи уште од 2017 година се говореше дека се гради камп за мигранти, што со годините беше демантирано со многу малиот број на лица кои доѓаа во нашата земја и речиси ниту еден од нив не сакаше да остане тука.
МВР тогаш објави дека се работи за прифатен центар за странци, односно нов објект за постоечката „куќа на стравот“ во Гази Баба која не исполнува ни минимум човечки услови.
На таблата која е поставена на самата локација каде што се гради стои дека се работи за проект финансиран од ЕУ од 1,5 милиони евра, преку ИПА 2016 програмата „Миграции и азил, гранично управување и борба против тероризмот и организираниот криминал.
Четири години подоцна, со протестите на жителите, оживеа повторно оваа идеја – дека се гради прифатен центар за мигранти.
Од МВР повеќепати изјавија дека она што се гради таму нема врска со мигрантите, туку е центар за странци и тоа не нов центар, туку само нов објект кој треба засекогаш да го прати во истријата она што како објект се наоѓа во Гази Баба.
„Прифатниот центар сместен во Гази Баба е целосно некомпатибилен за намената и поради тоа ќе се гради нов како замена за постоечкиот. Во претходните години, иако повеќе пати беа реализирани градежни зафати за подобрување на условите за сместување, овој објект и понатаму не може да одговори на потребите за обезбедување на неопходните стандарди за сместување на странци, особено за ранливите категории на лица – жени, деца, лица со посебни потреби“,
посочуваа од МВР.