Владата на денешната седница го усвои мислењето на Министерството за правда да се прифати иницијативата за автентично толкување на членот 11 од Законот за помилување поднесено од пратениците Сашко Костов и Диме Велковски.
Според ова мислење, сите акти за помилување на претседателот на државата засновани на член 11 од Законот за помилување објавен во „Службен весник на Република Македонија“ број 20/1993, се незаконски и како такви ништовни.
Во образложението на ваквото мислење се вели дека со измените и дополнувањата на Законот за помилување во 2009 година членот 11 кој содржеше можност за помилување без спроведување на постапка е укинат, а во март 2016 година Уставниот суд го укина Законот за изменување и дополнување на Законот за помилување од 2009 година. Со укинувањето на законот од 2009 година, не се враќа во сила одредбата од членот 11.
Тоа значи дека претседателот на државата немал ниту, пак, сега има правна можност да даде помилување без спроведување постапка врз основа на тој член, се вели во мислењето од Министерството за правда што денеска го усвои Владата и кое ќе биде испратено до Законодавно-правната комисија на Собранието која треба да одлучува за иницијативата за автентично толкување на членот 11 од Законот за помилување.
Со барањето за автентично толкување на член 11 од Законот за помилување, пратениците од владејачкиот СДСМ сакаат да го спречат Уставниот суд во можноста да ги „воскресне“ помилувањата на поранешниот претседател Ѓорге Иванов за повеќе од 50 лица опфатени во случаите на Специјалното јавно обвинителство (СЈО). Очекувањата им се дека законодавниот дом ќе заклучи дека ваквиот член воопшто и не постои.
Претседателот на Собранието, Талат Џафери, вчера најави дека најрано на 11 декември ќе се знае кога ќе биде закажана собраниската седница по иницијативата.