Владата денеска донесе уредба со законска сила за запирање на примената на Законот за извршување, со што извршувањето се стопира до 30 јуни годинава.
„Според оваа Уредба, Член 2 утврдува дека извршителите се должни да запрат со преземање на какви било извршни дејствија, освен:
– Во предметите за побарувања врз основа на законска издршка;
– Со распределба на средствата пристигнати на нивните посебни сметки, доколку за тоа се исполнети законските услови;
– Со дејствијата кои следат по наплатата на средства од должникот, успешно спроведени јавни надавања, или продажби со непосредна спогодба.
Уредбата утврдува дека работодавците на должниците, Фондот за пензиско и инвалидско осигурување на РСМ и носителите на платен промет се должни да запрат со постапување по издадените налози од страна на извршителите, во периодот определен со Член 1 на оваа Уредба, односно до 30 јуни 2020 година“,
соопшти владината прес-служба.
Уредбата влегува во сила со денот на објавувањето во „Службен весник на Република Северна Македонија“.
„Основните судови во Република Северна Македонија, се должни да донесат одлуки по поднесените приговори за незаконитости при извршувањето врз основа на Член 86 од Законот за извршување, а Апелационите судови по поднесените жалби против решението на судот по приговор врз основа на член 87 од Законот за извршување, со цел да се создадат услови за непречена распределба на средствата пристигнати на посебните сметки на извршителите“,
се вели во соопштението.