Согласно предложениот текст на законот на Министерството за одбрана, меѓу другото, предвидено е усогласување со минималната плата, а тоа значи линеарно зголемување на платите на активниот воен и цивилен персонал, како и утврдување на правото на остварување на пензија со навршување на 40 години работен стаж, односно 38 за жените без оглед на возраста
На денешната редовна седница, Владата го усвои предлог-законот за изменување и дополнување на Законот за служба во Армијата на Република Северна Македонија, според кој е предвидено линеарно зголемување на платите на вработените во Армијата.
„Согласно предложениот текст на законот на Министерството за одбрана е предвидено усогласување со минималната плата, а тоа значи линеарно зголемување на платите на активниот воен и цивилен персонал, како и утврдување на правото на остварување на пензија со навршување на 40 години работен стаж, односно 38 за жените без оглед на возраста“,
стои во владиното соопштение по денешната редовна седница.
Со измените и дополнувањата на Законот, како што наведуваат од Владата, предвидено е и проширување на најповолните услови за пензионирање на сите припадници на воениот и цивилен персонал кои правото на пензија го стекнале од денот на формирање на Армијата во висина од 80 отсто во текот на најповолните десет години од пензискиот стаж.
„Во однос на отпремнината како можност за професионалните војници со навршени 45 години возраст, во износ од 1 000 евра за секоја година помината во Армијата, новиот предлог согласно барањето на Синдикатите е износот да биде две просечни плати но не помалку од 1 000 евра, со што е оставен простор за повисок износ“,
се додава во соопштението од Владата.
Во владиното соопштение додаваат и дека со новопредложените измени и дополнувања е предвидена и можност правото за земање отпремнина да се прошири на професионалните војници со навршени 45 години кои се задржани како помошно технички персонал во Министерството.
Со новите измени и дополнувања, текстот на Предлог-законот за служба во Армијата на Република Северна Македонија е испратен на усвојување во Собранието.