Конкурсите за стипендиите се очекува бидат објавени до крајот на овој месец, информираат од Владата повикувајќи се на најавата на Министерството за образование и наука (МОН)
На денешната 93. владина седница, меѓу другото, Магдалена Филиповска – Грашкоска е именувана е директорка на Фондот за здравствено осигурување, а прифатен е и усогласениот текст на Договорот Фронтекс
Владата на денешната седница донесе одлука за доделување стипендии во износ од 800 до 3 500 денари месечно за одредени категории ученици запишани во средните училишта во земјава во тековната 2022/2023 учебна година. Од Владата посочуваат дека со одлуката се утврдува бројот на стипендистите и висината на стипендиите за ученици запишани во средното образование.
Па така, според владината одлука, стипендии во износ од 3 500 денари месечно се предвидени за:
- талентирани ученици – спортисти;
- талентирани ученици од областите на природните и техничките науки;
- талентирани ученици од областа на уметностите;
- за ученици со посебни потреби;
- за социјална поддршка на ученици од средното образование;
- за ученици – деца без родители;
- за ученици кои реализираат наставни програми од угостителско-туристичка струка;
- за наставни програми од електро-техничка струка;
- за наставни програми од градежно-геодетска струка;
- за наставни програми од земјоделско-ветеринарна струка;
- за наставни програми од машинска струка;
- за наставни програми од текстилно-кожарска струка;
- за ученици кои реализираат наставни планови и програми за стручно оспособување и стручно образование од тригодишно траење;
- за ученици кои ќе се запишат во паралелки во стручно образование, во коишто ќе се реализира практично образование со зголемен број на часови, согласно програмите за стручно образование.
Дополнително, предвидени се и стипендии за ученици Роми во износ од 2 200 денари месечно за ученици кои имаат среден успех од 4.50 до 5.00; од 1 500 денари месечно за ученици кои имаат среден успех од 3.50 до 4.49; од 1 200 денари месечно за ученици кои имаат среден успех од 3.00 до 3.49 и стипенции од 800 денари месечно за ученици кои имаат среден успех од 2.00 до 2.99.
Конкурсите за стипендиите се очекува бидат објавени до крајот на овој месец, информираат од Владата повикувајќи се на најавата на Министерството за образование и наука (МОН).
На денешната 93. владина седница, меѓу другото, на предлог на министерот за здравство Беким Сали за директорка на Фондот за здравствено осигурување на Република Северна Македонија е именувана Магдалена Филиповска – Грашкоска.
Дополнително, Владата го разгледа и усвои и извештајoт од МВР за извршени преговори со усогласен текст на Договорот меѓу Северна Македонија и ЕУ за оперативни активности спроведени од страна на Агенцијата за европска гранична и крајбрежна стража во Република Северна Македонија (Фронтекс) и го разгледа и прифати усогласениот текст на Договорот.
„Со потпишувањето на Договорот, според информацијата од МВР, се создаваат неопходните правни предуслови коишто ќе овозможат непосредна соработка меѓу надлежните органи на двете Договорни страни, за ситуации кога членови на тимот на Агенцијата за европска гранична и крајбрежна стража имаат извршни овластувања на територијата на Република Северна Македонија, а во контекст на управувањето со миграциските текови и сузбивањето на незаконска миграција и прекуграничен криминал во Република Северна Македонија“,
информираат од владиниот прес-центар.