Членовите од предлог-законот за изменување на Законот за јавни собири, кои наидоа на остри критики во јавноста поради строгите ограничувања на правото на протест, Владата целосно ги избриша откако претходно еднаш ги повлече од Собрание на дополнителни консултации. Од Владата за „360 степени“ велат дека новата верзија, која веќе е во собраниска процедура, предвидува само регулација на паричните санкции и усогласување со новиот Закон за прекршоци.
„Постапката на усогласувањето на Законот за јавни собири со Законот за прекршоци во врска со одредбите за висината на казните останува. Повлечени се одредбите со кои се вршеа други измени, надвор од усогласувањето со Законот за прекршоци. Измените беа повлечени со цел да добиеме поквалитетно решение, односно сметавме дека треба дополнително да се консултира пошироката јавност, невладини организации и други заинтересирани страни“,
велат од Владата за „360 степени”.
Министерството за внатрешни работи, кое е предлагач на законот, претходно предложи нови критериуми за организирање јавни собири со кои се забрануваше протест пред сите државни институции и просторот околу нив, како и околу странските амбасади. Времето за демонстрации се ограничуваше до 23 часот, а минималниот број на лица кои можат да организираат протест од 20 се зголемуваше на 50 лица. Сепак, по многубројните критики дека измените се косат со Уставот, Владата ги повлече спорните предложени измени.
„Ги слушнавме реакциите на граѓаните и веднаш реагиравме. Ќе ги слушнеме граѓаните, невладиниот сектор, ќе видиме како демократите го прават тоа“,
изјави тогашниот премиер Зоран Заев.
Со сегашните измени сега се интервенира во членот 9 и 10 од Законот за јавни собири, за паричните глоби и санкции на организаторите на протести кои не презеле мерки за обезбедување на јавниот ред и мир.
Новиот предлог-закон досега помина на Комисија за одбрана и безбедност и во Законодавно-правна комисија, а денеска е ставен на второ читање.