По 1 септември, ќе се одреди домашна изолација од седум дена за наши граѓани кои ќе се враќаат во земјата без ПЦР – тест, потврда за вакцина или за прележан коронавирус
Учебната 2021/2022 година ќе почне со физичко присуство, со полн капацитет, според утврдените протоколи, но постојано ќе се следат состојбите, а како алтернатива постојат две сценарија: целосно преминување на онлајн настава или комбинирано
Врз основа на препораките од Комисијата за заразни болести, Владата, на денешната седница, ги донесе најновите мерки, протоколи и препораки за заштита на населението од ковид-19:
- За влез во угостителски објекти, кафулиња и барови, без разлика на капацитетот и бројот на присутни посетители/гости/лица, како и за настан од секаков вид (прослава, веселба, свадба, роденден, крштевка, концерт, семинар, обука, работилница, конференција, културен или спортски настан, обложувалници, казина), задолжително е поседување, приложување и проверка на еден од следните документи: сертификат/потврда за извршена имунизација, односно примена најмалку прва доза вакцина; сертификат/потврда за прележан ковид-19 во последните 45 дена, сметајќи од денот на оздравувањето, за полнолетни лица.
- Оваа мерка задолжително се применува и за организација, работа и присуство/учество на секаков вид на настан на отворен простор, каде што има повеќе луѓе, како и за влез во затворениот дел од моловите.
- Во сите угостителски објекти, кафулиња и барови, каде што капацитетот е поголем од 30 посетители задолжителнo e воспоставување редарска служба за контрола и спроведување на мерката.
- Во угостителските објекти со капацитет помал од 30 лица контролата на поседувањето на ковид-19 сертификатот на посетителите е должност на редовно вработените лица.
- Овие мерки стапуваат на сила по нивното објавување во „Службен весник“, односно од утре.
- Останува забраната за организација на свадби, веселби и прослави во објекти од затворен тип, додека друг тип на настани на затворено и натаму може да се организираат со исполнетост до 30 отсто од капацитетот, со приложување и проверка на еден од задолжителните ковид – 19 документи.
- Од 1 септември 2021 година, домашни и странски државјани ќе можат да влезат на Северна Македонија доколку претходно на граничниот премин приложат: сертификат/потврда за извршена имунизација, односно примени најмалку две дози на вакцина,; потврда за прележан ковид-19 во последните 45 дена, сметајќи од денот на оздравувањето или медицинска потврда со негативен резултат од RT PCR SARS-CoV-2 тест, направен 72 часа пред влез на територијата на државата.
- За наши граѓани кои ќе се враќаат во земјата после 1 септември, а немаат ПЦР – тест, или потврди за примена вакцина или за прележан ковид- 19, ќе се одреди домашна изолација од седум дена со решение од Државниот санитарен и здравствен инспекторат.
- Странски државјани може да транзитираат низ земјава до пет часа, со претходно потпишана изјава на влезот во земјата која ќе треба да ја приложат пред граничната контрола на излезот од државата.
- Владата го усвои и протоколот за превентивни мерки при спроведување на пописот на населението, домаќинствата и становите.
- На предлог на Министерството за образование и наука, а со одобрување на Комисијата за заразни болести, на денешната седница е донесена одлука учебната 2021/2022 година да започне со физичко присуство, со полн капацитет, според утврдените и донесени протоколи. Исклучоци од оваа одлука може да се однесуваат на деца со ретки болести или попречености, деца кои доаѓаат од семејства со хронично болни семејства, по барање на родителите, како и други немедицински причини со дозвола на училиштето.
- Беше истакнато дека постојано ќе се следат состојбите и дека како алтернатива постојат дополнителни две сценарија: преминување на целосно онлајн настава или комбинирано, доколку дојде до промена на состојбата со пандемијата.