Во објектите со површина помала од 20 квадрати може да пазарува само едно лице
Владата, на денешната седница, донесе Уредба за примена на Законот за трговија за време на вонредна состојба. Со тоа, во листата на трговски објекти се додаваат „дуќани” и се утврдува дека во објектите во кои се врши трговија на мало, истовремено може да пазаруваат најмногу по едно лице на површина од секои 20 квадратни метри. Во објектите, пак, со површина помала од 20 квадрати може да пазарува само едно лице.
Трговецот треба да обезбеди заштитна опрема (маски и ракавици) за вработените лица, кои, пак, се должни да ја носат постојано во текот на работното време.
Владата денеска донесе и Уредба за примена на Законот за поштенските услуги за време на вонредна состојба. Согласно со оваа Уредба, давателите на поштенски услуги се должни да обезбедат редарска служба на влезот, во внатрешноста и на излезот на објектот, за да се запази минимум потребното растојание помеѓу лицата пред и внатре во објектот. Исто така, треба да се обезбеди задолжителна дезинфекција на раце при влез во објектот и задолжително носење на заштитна маска, марама или шал со кој ќе бидат покриени устата и носот на корисникот на поштенската услуга.
„Давателите на поштенски услуги се должни да постават соодветни ознаки со кои се обележува правецот на движење и запазување на минимум потребното растојание при чекање ред пред и внатре во објектот. Ознаките се поставуваат на растојание од најмалку два метри и тоа: пред секој пункт/шалтер, како и пред влезот на објектот“,
информираат од Влада.
Уредбата ги задолжува давателите на поштенски услуги најмалку еднаш неделно да вршат превентивна дезинфекција во објектите.
На денешната седница, е донесена и Уредба со законска сила за примена на Законот за банките за време на вонредна состојба. Според оваа Уредба, банките и штедилниците исто така се должни да обезбедат редарска служба при влезот во и при излезот од објектот, за да се запази минимум потребното растојание, задолжителна дезинфекција на раце и да не се дозволи влезна лица кои не носат заштитна маска, марама или шал.
„Банките и штедилниците се должни да постават соодветни ознаки со кои се обележува правецот на движење и запазување на минимум потребното растојание при чекање ред пред и внатре во објектот на растојание од најмалку два метра и тоа пред секој шалтер на кој корисниците пристапуваат за вршење финансиски услуги, како и во дијаметар од 10 метри пред влезот на објектот“,
соопштија од Влада.
Согласно оваа уредба банките и штедилниците се должни на вработените лица кои работат во објектите или имаат контакт со клиенти да им обезбедат заштитна опрема (ракавици и маски) кои се должни да ги носат во текот на целото работно време. Уредбата определува дека во банките и штедилниците во исто време, заедно со вработените, не смее да има повеќе од 5 лица во просторија до 50 квадратни метри, – повеќе од 10 лица во просторија од 50 до 100 квадратни метри, повеќе од 15 лица во просторија од 100 до 200 квадратни метри и повеќе од 20 лица во просторија над 200 квадратни метри.