Целта на посетата е уште во првите денови од мандатот на владата на канцеларот Шолц да се насочи вниманието кон европското досие на Северна Македонија и ангажманот на Германија во регионот
Вицепремиерот за европски прашања Никола Димитров утре и задутре ќе престојува со работна посета на Германија.
Како што соопшти Секретаријатот за европски прашања, предвидени средби со високи претставници на новоформираната германска влада, вклучително и со новата државна министерка за Европа – Ана Лирман, која на првиот ден од преземањето на функцијата од Михаел Рот, ќе се сретне со вицепремиерот Димитров.
Целта на посетата е уште во првите денови од мандатот на владата на канцеларот Шолц да се насочи вниманието кон европското досие на Северна Македонија и ангажманот на Германија во регионот, велат од СЕП.
Покрај средбите во МНР и Бундестагот, Димитров ќе го покрене прашањето за евроинтеграцијата на регионот и на годишната конференција на Европскиот совет за надворешни односи (ECFR), клучен настан на европскиот политички календар што ги обединува највисоките носители на одлуки на континентот, еминентни интелектуалци, претставници на невладиното општество и тинк-тенк заедницата.
Вицепремиерот Никола Димитров во мај годинава стана официјален член на ЕЦФР, водечка меѓународна тинк-тенк организација, посветена на европската надворешна и безбедносна политика.