Откажани се и сите едукативни настани и организирани посети на македонскиот парламент, поради ситуацијата со коронавирусот и прогласената вонредна состојба во земјава. Наместо тоа, Собранието изработи веб страница која нуди можност за виртуелна прошетка низ собраниската зграда. Оние кои ќе отидат на страницата vtour.sobranie.mk ќе можат по електронски пат да ја разгледаат внатрешноста на законодавниот дом.
„Со прогласувањето на состојба на пандемија од страна на СЗО и согласно со препораките на владата на Северна Македонија, од 11 март, сите едукативни активности наменети за јавноста, како и организирани посети на зградата на законодавниот дом се одложени се до нормализација на ситуацијата. Во меѓувреме, секој што би сакал да ја разгледа внатрешноста на зградата, тоа може да го направи преку нашата виртуелна тура“,
велат од Собранието.
Деветтиот собраниски состав во земјава е распуштен од 16 февруари годинава, со цел да се одржат парламентарните избори на 12 април. Но ситуацијата со коронавирусот доведе до одложување на изборите на неопределено време, така што е извесно и дека парламентот ќе биде распуштен подолго од 60 дена – како максимален уставен рок за одржување предвремени избори.
Забраната за помасовни собири е една од причините поради кои спикерот Талат Џафери тврдеше дека парламентот не може да се собере и да прогласи вонредна состојба, покрај ставот дека пратениците што се самораспуштиле немаат мандат да носат одлуки. Поради тоа, прогласувањето на вонредната состојба, на 18 март, му припадна како обврска на претседателот Стево Пендаровски.