Веднаш по завршувањето на предизборното соочување на претендентите за претседател на Хрватска кое се одржа на националната телевизија ХРТ, опозицискиот кандидат Зоран Милановиќ беше вербално нападнат од советник на актуелната шефица на државата Колинда Грабар Китаровиќ.
Причина за атакот е лошиот настап на Китаровиќ на дуелот и особено споменувањето на пропаста на компанија на бизнисмен во чиј надзорен одбор била токму таа.
Давајќи изјава за медиумите по соочувањето, Милановиќ повторно ја спомнува фирмата, по што откако тоа го слуша, гласно, пред камерите, советникот на Китаровиќ, Томислав Маџар му довикнува дека треба да му е срам.
Милановиќ, не знаејќи кој е човекот, ги прашува новинарите дали лицето е дел од обезбедувањето на Китаровиќ, по што тие му укажуваат дека е нејзин советник.
Додека Милановиќ полека се оддалечува и тргнува накај излезот, Маџар продолжува да вика по него и да бара одговори зошто кога си заминал од премиерската функција и почнал приватен бизнис бил пријавен на минимална плата.
„Тоа е Вашето стопанство“,
заклучува Маџар.
Милановиќ се враќа и му одговора.
„Ете, тоа Ви е ХДЗ. Би се тепале и во Парламентот, ама не знаат да се тепаат. Пцујат и вака разговараат со поранешен премиер. Јас овој човек не го познавам, не знам кој е. И натаму има нестабилни луѓе. Ова е бедно“,
вели тој и ја напушта зградата на ХРТ“.
Веднаш по Милановиќ пред новинарите се појави и Китаровиќ, но нејзиното обезбедување ја извлече и не дозволи таа да одговори на прашањето поврзано со инцидентот кој го предизвика нејзиниот советник.
Во текот на вечерта, во изјава за хрватските медиуми, Томислав Маџар се извини затоа што на снимка делува како насилник, но своето однесување го оправда со однесувањето на противкандидатот на неговата шефица.
„Тој цели 6 месеци, во текот на кампањата ги напаѓаше бранителите, црквата, ХДЗ па и претседателката. Жал ми е што го сторив тоа, но на ист начин како што јас реагирав тој се однесуваше за време на дуелот. Ја напаѓаше, ја понижуваше и јас мислев дека не е во ред на таков начин да се води дебата. Се надевам дека овој инцидент нема да и наштети на претседателката бидејќи го сторив јас а не таа“, појасни Маџар за Јутарњи Лист .
Портпаролот на кандидатот Милановиќ, Никола Јелиќ на својот твитер налог напиша дека во текот на ноќта, шефот на штабот на Китаровиќ лично му се извинил на Милановиќ за вербалниот испад на советникот Томислав Маџар.
фото: Boris Kovačev / CROPIX
Вториот и решавачки круг од претседателски избори во Хрватска ќе се одржи в недела. Се очекува неизвесна битка, со оглед дека разликата во првиот круг беше минимална, во корист на Милановиќ.