Западниот дел на Хаити денеска беше погоден од земјотрес со јачина од седум степени според Рихтеровата скала, објави Американскиот институт за геолошки истражувања. Епицентарот бил на осум километри од градот Петит Тру де Нип и на 100 километри од главниот град Порт-о-Пренс на длабочина од 10 километри.
Европско-медитеранскиот сеизмолошки центар претходно објави дека земјотресот во овој регион бил со јачина од 7,6 степени.
Американскиот центар за предупредување од цунами издаде тревога за цунами, иако тоа не го стори веднаш по земјотресот. Беше наведено дека на Хаити му се закануваат бранови високи три метри.
Снимките што доаѓаат од карипската земја покажуваат уништени куќи, згради и објекти, распукани патишта и луѓе кои во очај гледаат што останало од нивните домови.
Сцените се апокалиптични, а медиумите јавуваат дека е пријавена голема штета.
#Haitiearthquake please HELP NOW !!! Cayes @Pwoteksyonsivil @RedCross #portsalut pic.twitter.com/O2dpu9B0oV
— Henry Beaucejour (@HBeaucejour) August 14, 2021
Според сѐ уште неофицијални информации, неколку медиуми објавија дека има загинати и многу повредени. Американскиот геолошки завод извести дека бројот на жртви веројатно е голем.
Primeras imágenes de los daños en Haití por el poderoso sismo de 7.2.#TerremotoHaití pic.twitter.com/1RbxZKVl6A
— Miguel Torruco Garza (@MiguelTorrucoG) August 14, 2021
Земјотресот, кој го почувствуваа и други карипски острови, вклучувајќи ги Куба и Јамајка, се случи нешто повеќе од еден месец откако претседателот на Хаити, Жовенел Моис, беше убиен во својата резиденција во главниот град Порт-о-Пренс.
Според медиумите, земјотресот бил посилен од катастрофалниот земјотрес што го погоди островот во 2010 година и во кој загинаа повеќе од 100 000 луѓе.
Се проценува дека повеќе од 200 000 луѓе загинаа по разорниот земјотрес со јачина од седум степени според Рихтеровата скала што го погоди Хаити пред 11 години и го урна поголемиот дел од главниот град на земјата.