Претседателката на работното тело, Жаклина Лазаревска од СДСМ, беше принудена да даде пауза, откако, поради несогласувања околу дневниот ред, до нејзината маса, викајќи и мавтајќи, пристапија присутните опозициски пратеници
Во атмосфера на раб на поголем инцидент почна денеска седницата на собраниската Комисија за образование, на која повторно не успеа да се отвори расправата по двете точки на дневниот ред, меѓу кои е и Законот за наставници за кој СДСМ подолго време реагира дека е блокиран од опозицијата.
Иако Собранието вообичаено не заседава во петок и во тој ден не се одржуваат ни комисиски седници, претседателката на Комисијата за образование и наука, Жаклина Лазаревска од СДСМ, се обиде денеска да ја одблокира постапката за донесување на законот за наставници, кој е пуштен во собраниска процедура уште во јуни минатата година, кога министерка беше Мила Царовска.
Сепак, Лазаревска беше принудена да даде пауза, откако, поради несогласувања околу дневниот ред, до нејзината маса, викајќи и мавтајќи, пристапија присутните опозициски пратеници.
Според Лазаревска, дневниот ред на оваа седница, која денеска има петто продолжение, бил изгласан со осум гласа „за“ на седницата на 17 јуни 2021 и затоа продолжуваат со работа.
Пратениците на ВМРО-ДПМНЕ, пак, бурно реагираа негирајќи дека дневниот ред тогаш бил усвоен и побараа снимка од таа седница. Инсистираа дека треба да им се дозволат процедурални излагања пред усвојување на дневниот ред.
„Колку што сакате процедурални ќе имате, ако сакате пет месеци, не е проблем“,
рече Лазаревска, која за да ја смири ситуацијата даде еден час пауза, како што рече, за понатамошни договарања.
На дневен ред на денешната седница се измени на Законот за наставници и стручни соработници во основните и во средните училишта и на Законот за Бирото за развој на образованието. И двата закона се во прво читање.
„На седницата на Комисијата за образование наука и спорт кулминираше деструктивноста на ВМРО-ДПМНЕ. Блокадите на законот за наставници и стручни соработници во основното и средното образование денеска се претворија во обиди за физичко насилство, закани и хаос. Пратениците на ВМРО-ДПМНЕ не дозволуваат ниту да почне расправата за овие измени, а не пак тие да бидат донесени. Срамно, ниско и безобразно е денешното однесување на пратениците од редовите на ВМРО-ДПМНЕ“,
реагираат во СДСМ по денешните тензии на комисиската седница.
Со овие измени, според владејачката партија, над 27 000 наставници и стручни соработници ќе добиваат повисоки плати, а околу 4 700 од нив ќе добијат трајно вработување.
„Тоа ВМРО-ДПМНЕ го блокира цела година, го блокираше и денеска со попречување на работата, со викање и закани, деградирајќи го Собранието. Ете колку ВМРО-ДПМНЕ се грижи за наставниците, денеска на виделина уште еднаш излезе нивното лицемерство, нивната насилничка матрица и деструктивно дејствување“,
велат од СДСМ.