Спорно за опозицијата е тоа што, како што велат, законот за Академијата за судии и обвинители прво бил пуштен во собраниска процедура по редовна постапка, а денеска „му е залепено европското знаме“, без образложение од кој дел од директивите на ЕУ произлегува
Во тензична атмосфера почна денес седницата на Комисијата за политички систем во Собранието, како што може да се забележи од видео што го снимиле опозициски пратеници.
Од видеото може да се види како опозициските пратеници се собираат околу говорницата во салата „Борис Трајковски“, додека пратеникот на ГРОМ, Љупчо Пренџов, зборува за непочитување на процедурите при утврдувањето на дневниот ред за денешната седница. Во тоа време, пак, пратениците од мнозинството ја напуштаат салата.
Комисиските седници во парламентот се затворени за јавноста од почетокот на овој парламентарен состав, кој го почна мандатот во екот на епидемијата на коронавирусот.
Сепак, во изминатиот период повремено беше дозволено присуство на новинари кога се одржуваа седници во салара „Борис Трајковски“, која има и галерија за медиумите.
Сепак, пратеници од опозицијата, повикувајќи се на разговори со новинари, велат дека дека денеска на новинарите не им бил дозволен влез во галеријата, под изговор дека тоа не е во согласност со ковид-протоколите.
Спорно за опозицијаtа е тоа што, како што велат, законот за Академијата за судии и обвинители прво бил пуштен во собраниска процедура по редовна постапка, а денеска „му е залепено европското знаме“, без образложение од кој дел од директивите на ЕУ произлегува. ВМРО-ДПМНЕ најави неодамна дека ќе ги блокира сите закони за кои ќе забележи злоупотреба на еврооското знаме.