Во интервју за „360 степени“ дадено во Брисел, по учеството на сесијата на Комитетот за надворешни работи на Европскиот парламент и министерскиот состанок на НАТО, Муцунски одговараше и на прашањата дали Владата си има зададено неформален рок во кој ќе се обидува да издејствува уставни измени со одложено дејство и дали може да именува конкретни земји членки на ЕУ коишто ја прифаќаат оваа идеја и се подготвени да разговараат со Бугарија
Ова беше важна седмица за Северна Македонија во Брисел – и од аспект на Европската Унија и од аспект на НАТО. Премиерот Христијан Мицкоски се сретна со новата раководна постава во дел од европските институции – првпат откако Унијата ги избра клучните луѓе за клучните места, шефот на дипломатијата Тимчо Муцунски првпат учествуваше на сесија на Комитетот за надворешни работи на Европскиот парламент, а Радмила Шекеринска првпат партиципираше на едно заседание на НАТО во новата улога на заменик-генерална секретарка.
Хронолошки гледано, седмицата стартуваше со појавувањето на министерот Муцунски пред влијателниот Комитет за надворешни работи на Европскиот парламент. Целта беше да се разменат мислења за состојбата со македонските евроинтеграции кои не можат да се поместат кон наредната фаза поради незавршената обврска преземена во јули 2022 – промена на Уставот заради вметнување на Бугарите. Очекувано, Муцунски и новиот пристап на новата влада предводена од ВМРО-ДПМНЕ се најдоа на мета, пред се, на европратениците од Бугарија. Но, Муцунски доби прашање на оваа тема уште на почетокот на сесијата и тоа од претседавачот со Комитетот, германскиот европратеник од ЦДУ, Дејвид Мекалистер: „Што планира новата влада да преземе за да се надмине ќорсокакот“.
„Континуираната употреба на вето од Бугарија во нашето пристапување кон ЕУ е особено болна и не само што го кочи нашиот напредок, туку и праќа лоша порака за состојбата на европската солидарност и заемна почит. Со дозволувањето билатерални прашања да доминираат во пристапниот процес ризикуваме овој механизам да се претвори во алатка на поделби, а не на обединување. Напредокот не може да дојде од унилатерални барања или ултиматуми, туку тој бара заемна почит, разбирање и храброст од двете страни. Ја повикуваме Бугарија да ни се придружи во овој напор за заедно да ги надминеме предизвиците и да изградиме однос што вистински ќе го одразува европското партнерство“,
рече Муцунски.
По седницата на Комитетот за надворешни работи во Европскиот парламент, новиот известувач за земјава, австрискиот европратеник Томас Вајц, кој доаѓа од групацијата на „Зелените“, даде интервју за „360 степени“. По неговите изјави дека „има потреба од некакви правни гаранции од бугарска страна дека по уставните измени, нема да има нови барања“. прашан дали е ова остварливо и кој може да гарантира дека нешто нема да се случи за 5-10 години отсега, Вајц одговори:
„Сите сме навикнати на потпишување договори меѓу себе, на сериозно потенцирање на нашите обврски коишто ги потпишуваме во договорите и, како што е случај во секоја демократска држава, Владите може да се сменат, мнозинството може да се смени, и тоа е добро. Така што, апсолутно, стопроцентна гаранција е нешто што ниту една земја не може да го обезбеди за пет или десет години отсега. Но, би можело да има билатерални договори кои би покажале дека барањата се исполнети и дека бугарската влада, штом имаме влада зашто тоа е дел од проблемот, или претседателот, ако дозволуваат неговите овластувања, можат да потпишат ваков договор, билатерален договор. Тоа би дало еден добар сет на гаранции дека нема да има други билатерални барања на маса. Но, уште еднаш, мислам дека е подобро решение, ние ЕУ да го смениме методот и да не се потпираме на едногласно носење одлуки за меѓучекорите во пристапниот процес. За да се почнат преговори – да. Исто така, да се има конечен договор за да се одобри една земја да влезе во ЕУ, таму би ни требало едногласност, но не за процесот помеѓу“.
Дали Владата си има зададено неформален рок во кој ќе се обидува да види дали може да издејствува уставни измени со одложено дејство, беше едно од прашањата на „360 степени“ до шефот на дипломатијата Тимчо во Брисел.
„Мислам дека би било грешка да си поставиме такви рокови затоа што од брзоплети односи базирани на апстрактни рокови сме тука каде што сме, од ветувања без сигурност и без некоја форма на правни и политички гаранции на секои две до три години ние се соочуваме со нова блокада и ново вето. Така што нелогично е да работиме со рокови. Логично е да работиме со принципи и со јасен став базиран на аргументи, како и што го правиме тоа во моментот“,
одговори министерот за надворешни работи и надворешна трговија.
Муцунски го прашавме и дали може да именува конкретни земји членки на ЕУ коишто ја прифаќаат оваа идеја и се подготвени да разговараат со Бугарија. Тој рече дека сака да верува оти фундаментот на ЕУ е базиран на култура на компромиси и дека кај огромно мнозинство земји членки постои атмосфера за изнаоѓање на компромис.
„Би било несоодветно во моментот да говорам во име на други земји и затоа, за жал, не можам да ви набројам кои се тие земји членки од коишто добиваме позитивен однос кон ваквиот пристап, но факт е дека постојат“,
рече шефот на дипломатијата.
Разговорот со Муцунски го водевме во просториите на македонската делегација во НАТО, во чие седиште во изминатите два дена се одржа состанок на Северноатлантскиот совет на ниво на министри за надворешни работи, на кој, во новото својство, како заменик-генерална секретарка на Алијансата, учествуваше и Радмила Шекеринска.