Аналитичарот Сефер Селими во дебата за „360 Степени“, зборуваше за претстојните парламентарни избори и коалицијата меѓу СДСМ и БЕСА која беше претставена како историска.
„Мислам дека оваа изборна кампања и оваа битка што ќе се одвива следните недели, сите политички партии влегуваат со морална криза пред своите гласачи. Било СДСМ, ВМРО, ДУИ, коалицијата на АА и Алтернатива, но коалицијата со Беса. Ако се гледа од гледна точка на тоа колку е природно една коалиција помеѓу една албанска политичка партија и македонска политичка партија, јас би рекол дека е многу природно, но и во некои моменти и задоцнето. Проблемот е дека носител на оваа коалиција е Беса, една мала партија и нема потенцијал за да ја наметне оваа коалиција како нешто кое е прифатливо за големиот дел од општеството. Ако оваа коалиција беше направена од ДУИ или АА, тогаш наративот целосно би се променил, така како што се промени наративот за претседателските избори каде на едни избори ДУИ повика на бојкотирање на претседателските избори, а следните избори беа во предизборна коалиција за да се даде поддршка на Стево Пендаровски. Истото се случи и на локалните избори од 2017 година, каде СДСМ на претходните избори се натпреваруваше со ВМРО-ДПМНЕ за противкандидатот на ДУИ, во тоа време во Кичево, и против кандидатот на АА, или ДПА во Струга, а во 2017 година се натпреваруваа заедно со ДУИ против ВМРО. Затоа велам дека ова ќе биде судир на морални кризи на политичките партии со своите гласачи. Никој од нив не може да каже дека ние сме со еден коректен морален однос пред гласачите“,
вели Селими.